سولتۇستىك قازاقستان وبلىسىندا بۇرىنعى قارجى پوليتسياسىنىڭ وكىلى مۇرات كۇشىباەۆ پارا العانى ءۇشىن ۇستالدى. ول ەلىمىزدىڭ ەكس پرەمەر-ءمينيسترى سەرىك احمەتوۆتى ۇستاپ بەرگەنىمەن تانىمال.

بۇل تۋرالى 7news.kz سايتىنا سىلتەمە جاساپ NUR.KZ حابارلايدى.

قارجى پوليتسياسى قۇرىلىمى وزگەرىسكە ۇشىراعان سوڭ، كۇشىباەۆ جاڭا قىزمەتكە شاقىرىلعان. ول سولتۇستىك قازاقستان وبلىسىندا مەملەكەتتىك كىرىس دەپارتامەنتى جانىنداعى ەكونوميكالىق زەرتتەۋ، جەدەل ىزدەستىرۋ توبىنىڭ جەتەكشىسى بولعان.

ءبىر قىزىعى، كولەڭكەلى بيزنەسپەن كۇرەسىپ جۇرگەن مۇرات كۇشىباەۆتىڭ ءوزى پارامەن ۇستالدى.

ول زاڭسىز الكوگول ساتۋمەن اينالىسىپ جۇرگەن كاسىپكەر ا. زارگارياننان ونىڭ كولەڭكەلى بيزنەسىنە كوز جۇما قاراۋ ءۇشىن $10 مىڭ كولەمىندە پارا سۇراعان. الايدا، ءوز تاۋارىنىڭ قۇنى 2 ميلليوننان اسپايتىنىن ايتقان كاسىپكەر كۇشىباەۆقا $8 مىڭ بەرۋگە كەلىسەدى.

اقشانى العان سوڭ كۇشىباەۆ  قىلمىسىن جاسىرۋ ماقساتىندا كاسىپكەر ءوزىن پارا الۋعا يتەرمەلەدى دەپ راپورت دايىنداعان. بىراق كاسىپكەر دە قاراپ قالماي، ءتيىستى ورىندارعا حابارلاسادى.

ناتيجەسىندە، ۇقك ماماندارى تاجىريبەلى قارجى پوليتسەيى سانالعان مۇرات كۇشىباەۆتى قولعا ءتۇسىردى.

«مۇنداي تاجىريبەلى ماماندى پارامەن ۇستاۋ وڭاي شارۋا ەمەس. الايدا، ول بار كىناسىن مويىندادى»، – دەيدى سقو مەملەكەتتىك قىزمەت جانە جەمقورلىققا قارسى كۇرەس اگەنتتىگىنىڭ باسشىسى شىڭعىس قابدۋللا.

مۇرات كۇشىباەۆ ءوز ورتاسىندا جوعارعى سوت مۇشەلەرى الماز تاشەنوۆ پەن سايلاۋبەك جاكىشوۆتى، بۇرىنعى پرەمەر-مينيستر سەرىك احمەتوۆ پەن قاراعاندى وبلىسىنىڭ ەكس-اكىمى باۋىرجان ابدىشەۆتى، سونىمەن قاتار كەنشىلەر وڭىرىندەگى بىرنەشە شەنەۋنىكتى پارا العانى ءۇشىن ۇستاپ بەرگەنىمەن تانىمال.

ول ەرەكشە كورسەتكىشتەرى ءۇشىن ەكى رەت مەدالمەن ماراپاتتالعان.

دەرەككوز: Nur.kz