ۋكراينا شىعىسىندا ۋكراين اسكەرى مەن رەسەيشىل سەپاراتيستەر اراسىندا بولعان سوڭعى قاقتىعىستاردان ءبىر ۋكراين ساربازى قازا تاۋىپ، توعىزى جارالاندى.

ۋكراينا قارۋلى كۇشتەرى ورتالىق شتابىنىڭ وكىلى ۆلاديسلاۆ سەلەزنەۆتىڭ حابارلاۋىنشا، ۋكراين اسكەرى دونەتسك وبلىسىندا سەپاراتيستەردىڭ ستارويگناتەۆكا قالاسىنا شابۋىلىن تويتارىپ، قالانى باقىلاۋدا ۇستاپ قالعان.

ستارويگناتەۆكا قالاسى سەپاراتيستەر باقىلاۋىنداعى دونەتسك قالاسى مەن ۋكراين اسكەرى باقىلايتىن ماريۋپول قالاسىنىڭ ارالىعىندا ورنالاسقان.

ۋكراينا پرەزيدەنتىنىڭ ءباسپاسوز حاتشىسى اندرەي لىسەنكو 10 تامىزدا جۋرناليستەرگە وتكەن ءتۇنى 400-گە جۋىق سەپاراتيست 10 تانكى مەن 10 بتر-دىڭ جانە باسقا دا اسكەري تەحنيكالاردىڭ كومەگىمەن ۋكراينا اسكەرىنىڭ پوزيتسيالارىنا شابۋىلداعانىن ايتقان.

لىسەنكونىڭ سوزىنشە، “قارسى تاراپ ادام سانى جاعىنان دا، تەحنيكا جاعىنان دا ەلەۋلى شىعىنعا ۇشىراعان”.

ال ءوزىن-ءوزى جاريالاعان “دونەتسك حالىق رەسپۋبليكاسىنىڭ” قورعانىس ءمينيسترى ەدۆارد باسۋرين ءوز قول استىنداعى كۇشتەر 10 تامىزدا “ۋكراين اسكەرىنىڭ ايماقتاعى شابۋىلىن تويتارعانىن” حابارلادى. ونىڭ سوزىنشە، ۋكراين كۇشتەرى “ەكى تانكى مەن ءبىر بتر-ىنان جانە زىمىرانى بار اسكەري كولىگىنەن ايىرىلعان”.

دونباستا 2014 جىلى ساۋىردە باستالعان ۋكراينا ۇكىمەتى اسكەرى مەن رەسەي قولدايتىن سەپاراتيستەر اراسىنداعى سوعىستان 6 مىڭ 500-دەن استام ادام قازا تاپتى.

2015 جىلى اقپاندا مينسكىدە قاقتىعىستى توقتاتۋ تۋرالى كەلىسىم جاسالعانىمەن، كەلىسىم تالاپتارى كۇن سايىن بۇزىلادى.

ازاتتىق راديوسى