“بۇلىكشى” تاجىك گەنەرالدىڭ وققا ۇشقانى حابارلاندى
kerey.kz
تاجىكستاندىق ءىىم مەن مۇقك روميت شاتقالىندا “قاشىپ جۇرگەن بۇلىكشى” گەنەرال ابدۋلحاليم نازارزودانىڭ كوزى جويىلعانىن جاريالادى.
قىركۇيەكتىڭ 16-سى كۇنى تاجىكستاننىڭ بۇرىنعى قورعانىس ۆيتسە-ءمينيسترى، 51 جاستاعى ابدۋلحاليم نازارزودانىڭ روميت شاتقالىندا اجال قۇشقانى حابارلاندى. ونى ۇستاۋ ءۇشىن دۋشانبە ارنايى وپەراتسيا ۇيىمداستىرعان ەدى. نازارزودانىڭ ولگەنىن ەلدىڭ ىشكى ىستەر ءمينيسترى مەن مەملەكەتتىك ۇلتتىق قاۋىپسىزدىك كوميتەتى راستادى.
رەسمي حابارلامادا: «2015 جىلدىڭ 16 قىركۇيەگىندە ساعات 14.00-دە ابدۋحاليم نازارزادانىڭ بانداسىن جويۋ بويىنشا ۇيىمداستىرىلعان انتيتەررورشىلىق وپەراتسياسى تولىق اياقتالدى» دەپ جازىلعان.
رەسمي مالىمەت بويىنشا، ءبىر جارىم تاۋلىككە سوزىلعان جەدەل-ىزدەستىرۋ شارالارى كەزىندە نازارزودانىڭ توبى روميت شاتقالىنداعى گۋسگەۆ دەگەن جەردە قورشاۋعا تۇسكەن. قارسىلىق كورسەتۋشىلەر ءوز ەركىمەن بەرىلۋدەن باس تارتقان. اتىس كەزىندە ابدۋلحاليم نازارزودامەن بىرگە دجۋنايدۋللو ۋماروۆ ەسىمدى جاقتاسىنىڭ جانە تاعى 10 ادامنىڭ وققا ۇشقانى ايتىلادى. بۇل ايماق دۋشانبەدەن 130 شاقىرىم جەردە ورنالاسقان.
نازارزودا توبىنىڭ مۇشەلەرىن ۇستاۋ كەزىندە سوڭعى تاۋلىكتە ەكى جاقتان جالپى سانى 16 ادام ولگەن. بۇعان دەيىن “الفا” ارنايى بولىمشەسى كومانديرىنىڭ دە قازا تاپقانى بەلگىلى بولعان.
تاجىكستان قاۋىپسىزدىك كۇشتەرىنىڭ نازارزودانىڭ قارۋلى توبىنا قارسى ارنايى وپەراتسياسى قىركۇيەكتىڭ 4-ىندە – ۆاحدات جانە دۋشانبە قالالارىنداعى ميليتسيا قىزمەتكەرلەرىنە جاسالعان شابۋىلى كەزىندە قۇقىق قورعاۋ ورگاندارىنىڭ توعىز قىزمەتكەرى قازا تاپقان سوڭ باستالعان. بيلىك “بۇلىك جاساۋ ماقساتىمەن شابۋىلداردى ۇيىمداستىردى” دەپ نازارزودانى ايىپتاعان. كەيىن گەنەرالدىڭ ءوز توبىمەن بىرگە روميت شاتقالىنا جاسىرىنعانى تۋرالى حابارلانعان ەدى.
ۇقشۇ سامميتىنە دۋشانبەگە بارعان قازاقستان پرەزيدەنتى نۇرسۇلتان نازارباەۆ تاجىكستاندىق ارىپتەسى ەمومالي راحمونمەن كەزدەسۋى كەزىندە بۇل شابۋىلدىڭ “سىرتقى اسەردىڭ ىقپالىنسىز بولماعانىنا سەنىمدى” ەكەنىن ايتقان.
1990 جىلدارى ابدۋلحاليم نازارزودا تاجىكستاندىق بىرىككەن وپپوزيتسياداعى قارۋلى توپتاردىڭ ءبىرىنىڭ جەتەكشىسى بولعان. 1997 جىلى بيلىكپەن مامىلە جاسالعان سوڭ ول قورعانىس سالاسىندا لاۋازىمدى قىزمەتتەر اتقارىپ كەلگەن.
ازاتتىق راديوسى
پىكىر قالدىرۋ