حالىقارالىق Bellingcat تەرگەۋ توبى 2014 جىلدىڭ شىلدەسىندە شىعىس ۋكراينادا Malaysia Airlines كومپانياسىنا تيەسىلى Boeing-777 ۇشاعىنىڭ اپاتقا ۇشىراۋىنا رەسەيلىك “بۋك” زىمىران كەشەنى سەبەپ بولعان دەپ مالىمدەدى.

توپتىڭ ەسەبىنە قاراعاندا، ۇشاقتى كۋرسك تۇبىندەگى زەنيتتى-زىمىران بريگاداسىنا تيەسىلى “بۋك” اتقان. قارۋ ۇشاق اپاتقا ۇشىراعان 17 شىلدە كۇنى دونەتسك وبلىسىنداعى سنەجنوە قالاسىنىڭ وڭتۇستىگىندە تۇرعان، ال 18 شىلدەدە لۋگانسكىگە قاراي اكەتىلگەن.

امستەردامنان كۋالا-لۋمپۋرعا ۇشىپ شىققان Boeing-777 ۇشاعى 2014 جىلدىڭ 17 شىلدەسىندە دونەتسك وبلىسىنىڭ گرابوۆو ەلدى مەكەنى اۋماعىندا اپاتقا ۇشىراعان. ۇشاقتاعى 298 ادامنىڭ بارلىعى قازا تاپتى.

ۋكراينا بيلىگى ۇشاق اپاتىنا “رەسەيلىك زەنيتتىك زىمىران كەشەنىن قولداندى” دەپ رەسەيشىل سەپاراتيستەردى ايىپتاعان. رەسەي اپات بولعان ايماقتا ۋكراينا اسكەري-اۋە كۇشتەرىنىڭ ۇشاقتارى بولۋى مۇمكىن ەكەنىن ايتقان.

ازاتتىق راديوسى