قىتاي قازاقتارى «قارا جورعانى» قحر-دىڭ 24 ايماعىندا بيلەدى (ۆيدەو)
kerey.kz
قىتايداعى قازاق ستۋدەنتتەرى بىرلەستىگىنىڭ بەلسەندىلەرى قازاق حاندىعىنىڭ 550 جىلدىعىنا وراي «قارا جورعا» ءبيىن قىتايدىڭ 24 ايماعىندا ورىنداپ، قازاقستاندىقتار ءۇشىن قۇتتىقتاۋ بەينەبايانىن دايىندادى.
«قازاقستان پرەزيدەنتى نۇرسۇلتان نازارباەۆ 2015 جىلدى قازاق حاندىعىنىڭ 550 جىلدىعىن مەرەكەلەۋ جىلى دەپ جاريالادى. ونى ەستىگەن كەزدە، دايىندىققا كىرىسىپ كەتتىك، ساۋىردەن باستاپ قازانعا دەيىن 24 ايماققا بارىپ، بارلىعىندا «قارا جورعا» ۇلتتىق ءبيىن ورىنداپ، تۇسىردىك. بۇل ءبىزدىڭ قازاقستانداعى وتانداستىرىمىزعا سىيلىعىمىز ءارى قازاقستاننىڭ تاريحى مەن مادەنيەتىنە قۇرمەت كورسەتۋىمىز»، – دەدى «قازاقپارات» تىلشىسىنە بەرگەن سۇحباتىندا قىتايداعى قازاق ستۋدەنتتەرى بىرلەستىگىنىڭ ورىنباسارى، حۋايبەي قالاسى (انحوي پروۆينتسياسى) حالىقارالىق ساياسات زەرتتەۋلەرى ورتالىعىنىڭ ستۋدەنتى جانە تاعىلىمگەرى جىگەر قابينۇلى.
ونىڭ ايتۋىنشا، بەينەباياننىڭ ءتۇسىرىلۋىن ۇيىمداستىرۋعا قىتايداعى قازاق ستۋدەنتتەرى بىرلەستىگىنىڭ 3 مىڭعا جۋىق مۇشەسى قاتىسقان. «قارا جورعا» ءبيى تەك شىڭجاڭ-ۇيعىر اۆتونومدىق وكرۋگىندە عانا ەمەس، حەنان، تسزيانسۋ، انحوي، چجەتسزيان، سىچۋان، تسينحاي، گانسۋ، گۋاندۋن، تاۋداعى تيبەت اۆتونومدىق اۋدانىندا جانە قحر-نىڭ باسقا دا ايماقتارىندا ورىندالعان. بەيجىڭدە جىگەر قابينۇلى تيانانمەن الاڭى مەن ۇلى قىتاي قورعانىندا بيلەدى.
پىكىر قالدىرۋ