دۇنيەجۇزىلىك بانكتىڭ بيزنەس جاساۋعا قولايلىلىقتى انىقتايتىن Doing Business 2016 رەيتينگىسىندە قازاقستان 12 ورىنعا كوتەرىلىپ، 41-ورىندى يەلەندى.

بىلتىر جاريالانعان رەيتينگدە قازاقستان 53-ورىندا بولعان ەدى.

دۇنيەجۇزىلىك بانكتىڭ Doing Bisuness رەيتينگىسىندە الەمنىڭ 189 ەلىندەگى بيزنەستى جۇرگىزۋدىڭ ون ءتۇرلى كورسەتكىشى ساراپقا سالىنادى. اتاپ ايتقاندا، بيزنەسكە سەپتەسەتىن نەمەسە كەدەرگى كەلتىرەتىن جايتتار – كاسىپورىن اشۋدان باستاپ، بيزنەستى جۇرگىزۋ، سىرتقى ساۋدا قىزمەتى، سالىق ساياساتى جانە ينۆەستورلار قۇقىعىن قورعاۋ سياقتى ولشەمدەرگە زەرتتەۋ جاسالىنادى. قازاقستان بويىنشا كورسەتكىشتەرگە الماتى قالاسى نەگىزگە الىنعان.

رەيتينگتى ونىنشى جىل قاتارىنان سينگاپۋر باستاپ تۇر، ونىمەن بىرگە العاشقى وندىقتا جاڭا زەلانديا، دانيا، وڭتۇستىك كورەيا، گونكونگ، ۇلىبريتانيا، اقش، شۆەتسيا، نورۆەگيا مەن فينليانديا بار.

پوستسوۆەتتىك ەلدەر اراسىنان قازاقستان – 41-ورىندا تۇرسا، بەلارۋس – 44, رەسەي – 51, مولدوۆا – 52, ازەربايجان – 63, قىرعىزستان – 67, ۋكراينا – 83 جانە تاجىكستان – 132-ورىندارعا ورنالاسقان.

ازاتتىق راديوسى