الماتى اكىمىنىڭ اۋىسۋى تۋرالى حاباردى قالالىقتار ارقالاي قابىلداعان بولاتىن. ءبىرى قۋانسا، ەكىنشىسى رەنىشىن ءبىلدىرىپ جاتتى. الايدا جاس اكىم ءوز جۇمىسىن جاقسى اتقارا الا ما دەپ باقىلاۋعا كىرىسكەندەر كوبىرەك بولدى.

NUR.KZ پورتالى Comode-قا سىلتەمە جاساپ باۋىرجان بايبەك كەلگەلى الماتىدا بايقالعان 15 وڭ وزگەرىستى نازارلارىڭىزعا ۇسىنادى.

الەۋمەتتىك جەلى

وڭ وزگەرىستەر ءتىزىمىن باۋىرجان بايبەك كەلگەلى الماتى قالاسىنىڭ اكىمدىگىندە جەكە Instagram اككاۋنتى پايدا بولعانىنان باستاعان دۇرىس. بۇل قادامنىڭ ارقاسىندا قالا تۇرعىندارى اكىمدىك جۇمىسىن باقىلاپ قانا قويماي، ءوز ۇسىنىستارى مەن شاعىمدارىن دا جەتكىزە الادى. ول ءۇشىن اكىمدىك اككاۋنتىنا فوتو جۇكتەۋ نە بولماسا ءوز پاراقشاڭداعى فوتوعا @akimat_almaty دەپ بەلگىلەۋ جەتىپ جاتىر. ال جاقىندا قالالىق اكىمشىلىك Periscope قوسىمشاسىنا دا تىركەلگەن.

جابىق ليۋكتەر

اشىق قالعان ليۋكتەر قالاداعى باستى ماسەلە ەكەنىن الماتىلىقتاردىڭ شاعىمىنان-اق بايقاۋعا بولادى. اكىمدىك Instagram-ىندا بۇل ماسەلە بارىنشا قولعا الىنعانىنا دالەلدەر بار. تۇرعىنداردىڭ وتىنىشىمەن 20 ليۋكتىڭ جابىلعانىن كورسەتەتىن فوتولار اكىمدىكتىڭ ەل شاعىمدارىن ەستىپ جاتقانىن بايقاتادى.

جوندەلگەن جولدار

ەندى تۇرعىندار جولدىڭ جوسپارمەن جاڭارتىلۋىن ايلاپ كۇتىپ جاتپايدى. بايبەكتىڭ توبى شۇڭقىرلار، وپىرىلعان اسفالتتار مەن توزىعى جەتكەن جولدارعا قاتىستى شاعىمدارعا جەدەل تۇردە ارەكەت ەتۋدە.

مەكتەپ تۇسىنداعى جاڭا سپورتتىق الاڭدار

جاڭا اكىمنىڭ كەلۋىمەن  جاڭا دەمەۋشىلەر پايدا بولعان سياقتى. قالادا بەلسەندى تۇردە جاڭا سپورت الاڭدارى سالىنا باستادى (كوبىنە مەكتەپ ماڭىنان). تەك قانا قازان ايىندا المالى، تۇركسىب، جەتىسۋ، اۋەزوۆ، بوستاندىق، مەدەۋ، الاتاۋ اۋداندارىندا جانە “العاباس”، “نۇركەنت” ىقشاماۋداندارىندا 16 سپورت الاڭىنىڭ سالىنۋى باستالدى.

بالالاردىڭ ويىن الاڭى

بايبەك قالانىڭ كىشكەنتاي تۇرعىندارىن دا ەستەن شىعارماعان. قالامىزدىڭ الاتاۋ، مەدەۋ، المالى جانە جەتىسۋ اۋداندارىندا بالالاردىڭ جاڭا ويىن الاڭدارى سالىندى. مەدەۋ اۋدانىنىڭ وزىندە عانا قاراشا ايىندا 17 سپورت جانە بالالار الاڭدارى دايىن بولادى دەپ كۇتىلۋدە.

ساياباقتار مەن دەمالىس ايماقتارى

جاڭا اكىمنىڭ توبى تۇرعىن ءۇي كەشەندەرىنىڭ ماڭىنداعى بوس جاتقان ايماقتارعا جاڭا قۇرىلىس سالۋدى بارىنشا قولعا العان. ونداي ايماقتارعا جۇگىرەتىن جولدارى، تۋرنيكتەر، شاحمات ويناۋ ءۇشىن ارنايى ورىندىقتارى بار ساياباقتار سالىنىپ جاتىر.

تازا ارىقتار

قالانىڭ ارىقتارىن ۋاقىتىلى تازارتىپ تۇرۋدىڭ دا ءوز ماڭىزى بار. كوشەلەردى سۋ باسۋدىڭ الدىن الاتىن بۇل شاراعا دا بايبەك ەرەكشە كوڭىل بولگەن.

تازا كوشەلەر

وكىنىشكە قاراي، الماتى تازا قالالاردىڭ قاتارىنا ەنبەيدى. الايدا جاڭا اكىم كەلگەلى قوقىستار سانى الدەقايدا ازايعان.

تەك تۇرمىستىق قوقىستار عانا ەمەس، كاسىپورىنداردان قالاتىن قالدىقتار دا تازارتىلا باستادى.

قالانى كوگالداندىرۋ

سوڭعى كەزدەرى اعاشتاردى شابۋ ءجيى كورىنىسكە اينالعانىنان حاباردار بولعان اكىم ەندى قالاداعى ءاربىر اعاشتى ەسەپكە الاتىن بولعان. ول ءۇش ايدىڭ ىشىندە زاڭسىز اعاش كەسكەن كوپتەگەن جەكە كاسىپورىنداردى جاۋاپكەرشىلىككە تارتتى. ەندى اعاشقا قول سۇققان ءار تۇرعىنعا قولدانىلاتىن جازا دا قاتايتىلعان.

جاياۋ جۇرگىنشىلەرگە جاعداي جاساۋ

جاياۋ جۇرگىنشىلەر، مۇگەدەكتەر ارباسىنا تاڭىلعاندار قالادا پاندۋستار مەن جولداردىڭ از دا بولسا رەتكە كەلىپ قالعانىنا رازى.

جاقىندا زووباقتاعى ايۋ تورى ماڭىنان جاڭا پاندۋس سالىندى. ەندى مۇمكىندىگى شەكتەۋلى ادامدار ەش كەدەرگىسىز ايۋلاردى تاماشالاۋ مۇمكىندىگىن الدى. بۇدان بولەك اكىمدىك جاڭا وتكەلدەر سالىپ، زاقىمدانعان تروتۋارلاردى جوندەۋگە جانە كوشەلەر مەن جول استى وتكەلدەرىن جارىقتاندىۋعا كىرىسكەن.

زاڭسىز قۇرىلىستاردى ءسۇرىپ تاستاۋ

باۋىرجان بايبەكتىڭ توبى زاڭسىز اعاش كەسۋدەن بولەك، زاڭسىز قۇرىلىستاردى دا جاۋاپقا تارتۋدا. سونىڭ ارقاسىندا مۇنداي قۇرىلىستاردىڭ ءبىرتالايى ءسۇرىلىپ تاستالدى.

قالا نىساندارىن سالۋدى باقىلاۋعا الۋ

الەۋمەتتىك ماڭىزدىلىعى بار قالا نىساندارىنىڭ قۇرىلىسىن ءوز باقىلاۋىنا العان بايبەك بالالار باقشاسى، مەكتەپتەر، ەمحانالار مەن حالىققا قىزمەت ەتۋ ورتالىقتارىنىڭ ۋاقىتىلى سالىنىپ بىتۋىنە مۇمكىندىك جاسادى. تۇرعىندار قاي نىسان قاي مەرزىمدە سالىنىپ بىتەتىنىن ناقتى بىلە الادى.

ۋاقىتىلى حاباردار ەتۋ

Instagram-دا اككاۋنت اشۋ ءبىر بولەك تە، ونى دۇرىستاپ پايداعا اسىرۋ ءبىر بولەك. وسى تۇرعىدا اكىم پاراقشانى قالا ءۇشىن ماڭىزدى اقپاراتتارمەن حاباردار ەتۋگە پايدالاناتىن بولعان.

تۇرعىنداردى كوشەلەردىڭ اپاتتاردان، جوندەۋ جۇمىستارىنان جابىلعانىنان باستاپ، قاي نىسان قاي ۋاقىتتا سالىنىپ بىتەتىنىنە دەيىن قۇلاعدار ەتىپ وتىرعان اكىم كۇن ساناپ تۇرعىنداردىڭ رازىلىعىن الۋدا.

ادەتتەگىدەن تىس ماسەلەلەردى شەشۋ

قالا باسشىلىعى تەك قانا اشىق ليۋكتەر مەن تولىپ قالعان ارىقتارعا قاتىستى قالالىقتاردىڭ شاعىمدارىن شەشىپ وتىر دەسەك قاتە ايتار ەدىك. تۇرعىنداردىڭ مىسىقتى اعاشتان ءتۇسىرىپ بەرۋ، كوشەنى ەسكىرگەن تەمىرجول ۆاگونىنان تازارتۋ سياقتى ادەتتەگىدەن تىس شاعىمدارعا دا اكىمشىلىك بەي-جاي قارامايدى.

ءبىلىم گرانتتارى

اكىمدىكتىڭ ۇكىمىمەن تەك ءۇش وقۋشى عانا ءبىلىم گرانتىن العانىنا قاراماستان، بۇل ماسەلەدە دە بايبەك كوزگە تۇسە الدى دەپ ايتۋعا بولادى. سەبەبى بايبەككە دەيىن ەشبىر اكىم ءبىلىم گرانتتارىنا قاتىستى ماسەلەگە لايىقتى نازار بولمەگەن.

 دەرەككوز: NUR.KZ