استانادا جاڭا تەمىر جول ۆوكزالىنىڭ قۇرىلىسى قارقىندى جۇرگىزىلۋدە، دەپ حابارلايدى «قتج» ۇك» اق ءباسپاسوز قىزمەتىنەن.

حالىقارالىق ەكسپو كورمەسىنە ارنالعان ۆوكزال اۋماعى قازىرگى قولدانىستاعى ەسكىسىنەن 11 ەسە ۇلكەن. ۇزىندىعى 630 مەتر، بيىكتىگى 49,5 مەتر، ەنى 116 مەتر.

“قۇرىلىسشىلار تاۋلىك بويى جۇمىس جاساۋدا. قازىرگى كەزدە ىرگەتاسى اياقتالىپ، ۆوكزالدىڭ قابىرعاسى كوتەرىلە باستادى. 13000 توننا مەتالل قۇراستىرماسى (58 پايىزى) يگەرىلدى. ۆوكزالدىڭ نەگىزگى قاۋسىرماسىن قاراعاندىلىق «يمستالكون» اق دايىنداۋدا”، – دەيدى «قتج» ۇك» اق فيليالى ءىرى جوبالاردى جۇزەگە اسىرۋ جونىندەگى ديرەكتسيانىڭ ديرەكتورى ۆلاديمير كلينگ.

ونىڭ ايتۋىنشا، قازىرگى كەزدە نىساندا 1300 مامان جۇمىسقا تارتىلعان.

جوبا بويىنشا، پويىزدار عيماراتتىڭ ىشىنە ەنەدى. ول ءۇشىن جابىق ۇلگىدەگى التى ەستاكادا سالىنۋدا. ەستاكادانىڭ ۇزىندىعى 2550 مەتر بولسا، وعان تىرەكتەردىڭ 87-ءسى تۇرعىزىلدى.

بۇگىنگە دەيىن ارالىق قۇرىلىستاعى 17300 توننا (69 پايىز) مەتالل قاۋسىرمالارى قۇراستىرىلدى.

جولاۋشىلارعا بارىنشا قولايلى بولۋى ءۇشىن سوڭعى ۇلگىدەگى عيمارات قۋات ۇنەمدەۋ ليفتىلەرىمەن، ەسكالاتورلارىمەن جابدىقتالادى. مۇندا جەر استى جىلۋ الماستىرعىشتارى ۆوكزالدى تەرمالدىق كوزدەر ارقىلى قىزدىرادى. مۇنداي تەحنولوگيا عيماراتتى قىستا جىلىتسا، جازدا سالقىنداتادى.

جوبا بويىنشا پويىزدار التى قاباتتى ۆوكزال ىشىنە كىرە الادى. اۆتوكولىك قۇرالدارى دا ونداعى جولاۋشىلار دا ۆوكزالعا كىرە بەرىستەگى 9,75 مەترلىك قاباتتا تەمىر جول پلاتفورماسىنا ايالدايدى.

قولدانىستاعى قازىرگى ۆوكزال تاۋلىگىنە 7 مىڭ ادامعا قىزمەت كورسەتەدى. ال جاڭا ۆوكزال ارقىلى تاۋلىگىنە 35 مىڭ جولاۋشى وتە الادى.

ەلوردانىڭ باستى تەمىر جول قاقپاسى وعان قوسىلاتىن توبىل، كوكشەتاۋ، قاراعاندى، پاۆلودار باعدارلارىنا جولاۋشىلاردى ءبىر مەزگىلدە ساپارعا اتتاندىرادى.

جاڭا استانا ۆوكزالى كەشەنى «مىڭجىلدىق» اللەياسىنا ورنالاسقان. ونى 2017 جىلعى ناۋرىزدا پايدالانۋعا بەرۋ جوسپارلانىپ وتىر.

 دەرەككوز: يا “كازينفورم”

nur.kz