تۇركيا ۇستىمىزدەگى جىلعى ماۋسىم ايىنان باستاپ الەمنىڭ 89 ەلىمەن ۆيزالىق رەجيمدى قالپىنا كەلتىرەدى. ولاردىڭ اراسىندا قازاقستان دا بار. بۇل تۋرالى تۇرىكتىڭ Haberizmir گازەتى حابارلادى.

باسىلىم حابارلاعانداي، بۇل تۋرالى شەشىم تۇركيا مەن ەۋروپا وداعى اراسىندا ۆيزالىق رەجيم مەن رەادميسسيانى جەڭىلدەتۋ تۋرالى كەلىسىمگە قول قويىلۋىنا بايلانىستى قابىلدانعان.

ۆيزالىق ءتارتىپ قايتا ەنگىزىلەتىن ەلدەر قاتارىندا قازاقستاننان بولەك، البانيا، ازەربايجان، بەليز، بوسنيا جانە گەرتسەگوۆينا، ەكۆاتور، گرۋزيا، يران، قىرعىزستان، رەسەي فەدەراتسياسى، موڭعوليا، وزبەكستان، تۇرىكمەنستان جانە ۋكراينا سياقتى داۋلەتتەردىڭ اتتارى اتالادى.

«Bu ülkeler arasında Arnavutluk, Azerbaycan, Belize, Bolivya, Bosna-Hersek, Fas, Ekvator, Gürcistan, İran, Kazakistan, Kırgızistan, Kolombiya, Lübnan, Makedonya, Maldivler, Sırbistan, Ukrayna, Ürdün, Rusya Federasyonu, Moğolistan, Özbekistan, Peru, Tacikistan, Tunus ve Türkmenistan da bulunuyor»، – دەپ اتاپ كورسەتەدى باسىلىم.

گازەتتىڭ جازۋىنا قاراعاندا، اتالمىش شەشىم تۇركيانىڭ تۋريستىك سەكتورى وكىلدەرى تاراپىنان الدەن الاڭداۋشىلىق تۋعىزىپ جاتىر. ەلدىڭ وتەلەر جانە ينۆەستورلار اسسوتسياتسياسىنىڭ جەتەكشىسى تيمۋر بايىندىر تۇركيا ازاماتتارىنا ەۋروپا وداعى ەلدەرىنە ۆيزاسىز بارۋ رەجيمىن ەنگىزۋدىڭ ماڭىزى زور بولعانىنا قاراماستان، ەندى انادولى جەرىنىڭ وزىنە تۋريستەردىڭ كەلۋ تاسقىنى كۇرت ازاياتىنىن ايتىپ، الاڭداۋشىلىق ءبىلدىردى.

«سىرتقى ىستەر مينيسترلىگى مەن مادەنيەت جانە تۋريزم مينيسترلىگى تۋريستەر تاسقىنىن تومەندەتپەۋدىڭ الدىن الىپ، ءتيىستى شارالاردى قولداناتىن شىعار دەگەن ۇمىتتەمىز»، – دەدى بايىندىر.

ras.kz