قازاقستاندىق بوكسشى قانات يسلام “ليتەر” باسىلىمىنا بەرگەن سۇحباتىندا چەمپيون بولۋدىڭ قيىندىقتارى جونىندە ايتىپ بەردى.

بوكسشىنىڭ ايتۋىنشا، وعان ەڭ قاجەتتى كەڭەستى بالا كەزىندە باپكەرى بەرىپتى. “بالا كەزىمدە العاش رەت بوكس جاتتىعۋىنا بارعانىم ەسىمدە. سوندا باپكەر بىزدەن كىم بولعىمىز كەلەتىنىن سۇرادى. ءبىز ءبىر اۋىزدان “چەمپيون!” دەپ جاۋاپ بەردىك. ول بىزگە سول كەزدە: “چەمپيون دايىنداۋعا بولادى، دەگەنمەن ماعان جاقسى ادامدار كەرەك” دەگەن ەدى. ول كەزدە بۇل ءسوزدىڭ بايىبىنا بارماعانىمىز راس. كەيىن ۇلكەن رينگكە شىعا باستاعان كەزدە باپكەرىمنىڭ سول كەزدە نە ايتقىسى كەلگەنىن ءتۇسىندىم. شىنىمەن دە چەمپيوندى دايىنداۋعا بولادى. دەگەنمەن “جۇلدىز اۋرۋىنا” شالدىعىپ، وزىڭە قوياتىن تالاپتارىڭدى ازايتساڭ، تاعىڭدا ۇزاق وتىرمايسىڭ. چەمپيون بولۋ – دارەجە عانا ەمەس، رۋحاني جۇك”، – دەدى بوكسشى.

ايتا كەتەيىك، قانات يسلام كاسىبي رينگتە 20 كەزدەسۋ وتكىزىپ، بارلىعىندا جەڭىسكە جەتتى. ونىڭ كەلەسى جەكپە-جەگى اقپاندا وتەدى. قازاقستاندىق بوكسشىنىڭ قارسىلاسى كىم بولاتىنى ازىرشە بەلگىسىز.

tengrinews.kz