سۇلۋباي باتىر
kerey.kz
سۇلۋباي ءساپيۇلى (1907-1944) اباق كەرەي – جانتەكەيدىڭ تاسبيكە رۋىنان. التاي قالاسىنىڭ شىرىكشي اۋلىندا تۋعان. سۇلۋبايدىڭ ءوز كىندىگىنەن ماعيلا، زاعيلا اتتى ەكى قىز. زاعيلا باركول اۋدانىندا ءالى بار. اعاسى بايبول مەن ءىنىسى كوڭبايدىڭ بالالارى شونجى مەن شىڭگىل اۋداندارىندا تۇرادى.
ۇلت-ازاتتىق قوزعالىسىنىڭ زۇلىمدىققا قارسى اتوي-شىلدارىنىڭ ءبىرى بولعان سۇلۋباي 1944 جىلى “التاي توڭكەرىستىك ۋاقىتشا وكىمەتى” قۇرىلعاندا ون باتىردىڭ ءبىرى بولىپ ماراپاتتالعان.
1944 جىلى كوكەكتىڭ باسىندا قازاق قولىن باستاپ، جاۋعا سىلەيتە سوققى بەرىپ جۇرگەن قان مايداندا قاپيادا وق ءتيىپ، ەرلىكپەن قازا تابادى.
سۇلۋبايدىڭ ءانى
اتىمدى سۇلۋباي دەپ اكەم قويعان،
رۋىم جانتەكەيدەي ورتانى ويعان-اي.
سەكپىلتاي، شاڭقان، تۇرعىندى-اي،
ساعىندىم قالعان قۇربىمدى-اي.
جازىقسىز جاۋىم مەنى قويدىڭ قاماپ،
كەتپەيدى بۇل قورلىعىڭ استە ويدان-اي.
شىڭگىلدىڭ ءمولدىر سۋىنداي،
دەپ سالعان ءانىم سۇلۋباي!
استىمدا القوڭىرىم جەلمەدىڭ عوي،
قۇدايىم سۇراعاندى بەرمەدىڭ عوي-اي.
بىلعارى بەلدىك، بۇراڭبەل،
بۇرىلار ما ەكەن ءبىزدىڭ ەل؟!
تالپىنىپ قانشا قانات قاققانمەنەن،
قىسقا ءجىپ كۇرمەۋىمە كەلمەدىڭ عوي-اي.
قايقايا شاپقان قاراگەر،
قايرىلار ما ەكەن قايران ەل؟
باسىندا ماۋەسى جوق قۋ قايىڭنىڭ،
جىگىتكە پايداسى جوق ۋايىمنىڭ-اي.
سەكپىلتاي، شاڭقان، تۇرعىندى-اي،
ساعىندىم قالعان قۇربىمدى-اي.
سان جەردىڭ ءدامىن تاتتىم، سۋىن ءىشتىم،
بىلمەيمىن قايدا الارىن قۇدايىمنىڭ-اي؟!
شىڭگىلدىڭ ءمولدىر سۋىنداي،
دەپ سالعان ءانىم سۇلۋباي.
قوناققا قوي سويادى لاق تۇرىپ،
قۇدىقتان سۋ ىشپەيدى بۇلاق تۇرىپ-اي.
بىلعارى بەلدىك، بۇراڭبەل،
بۇرىلار ما ەكەن ءبىزدىڭ ەل؟!
سۇلۋباي ەلىن قيماي، جەرىن قيماي،
قوشتاسقان ءانى وسى جىلاپ تۇرىپ-اي.
قايقايا شاپكان قاراگەر،
قايرىلار ما ەكەن قايران ەل؟!
پىكىر قالدىرۋ