“الاۋىزدىق تۋدىردى” دەگەن ايىپپەن ءۇش جىلعا سوتتالعان ازاماتتىق بەلسەندى ەرمەك نارىمباەۆقا قاتىستى بۇلتارتپاۋ شاراسى وزگەرتىلدى دەپ حابارلادى جۇبايى زويا نارىمباەۆا.

ونىڭ سوزىنشە، بۇگىن سوت «ەرمەك نارىمباەۆ پەن ونىڭ ادۆوكاتى جانار بالعاباەۆانىڭ قاتىسۋىنسىز، ەرمەكتى ەشقايدا كەتپەۋ تۋرالى قولحاتپەن بوساتۋعا اۋىستىرۋ تۋرالى شەشىم شىعارعان». زويا نارىمباەۆانىڭ سوزىنشە، ءبىر ايدان اسا ۋاقىت اشتىق جاريالاپ كەلە جاتقان ەرمەك نارىمباەۆ ءالى ۇيىنە كەلمەگەن.

جۋرناليست گۇلجان ەرعاليەۆانىڭ حابارلاۋىنشا، نارىمباەۆقا قاتىستى بۇلتارتپاۋ شاراسىن وزگەرتۋگە قاتىستى سوت بۇگىن تۇسكى ساعات 13.30-دا وتكەن، «ول [نارىمباەۆ] شامامەن ەكى ساعاتتان سوڭ ۇيىندە بولادى».

ال نارىمباەۆتىڭ ادۆوكاتى جانار بالعاباەۆا ازىرگە سوتتىڭ شەشىمى قولىنا تيمەگەندىكتەن ەشنارسە ايتا المايتىنىن حابارلادى.

ازاماتتىق بەلسەندىلەر ەرمەك نارىمباەۆ پەن سەرىكجان مامبەتالين بىلتىر قازاندا اۆتورى مۇرات تەلىبەكوۆ دەلىنگەن «ۆەتەر س ۋليتسى» كىتابىنىڭ ءۇزىندىسىن الەۋمەتتىك جەلىدە كوشىرىپ باسقانى ءۇشىن الماتىدا قاماۋعا الىنعان.

سەرىكجان مامبەتالين مەن ەرمەك نارىمباەۆ سوت پروتسەسى كەزىندە وزدەرىنىڭ كىناسىز ەكەنىن مالىمدەپ، ىستەرىنە وكىنبەيتىندەرىن ايتقان.

22 قاڭتار كۇنى المالى اۋداندىق سوتى مامبەتالينگە – ەكى جىل، نارىمباەۆقا ءۇش جىل تۇرمە جازاسىن كەسكەن. 29 قاڭتاردا سەرىكجان مامبەتاليننىڭ Facebook پاراقشاسىندا ونىڭ كوپشىلىككە ارنالعان ۇندەۋى شىققان. بەلسەندى «قاتەلىك جاساعانىن مويىندايتىنىن»، «بىراق قىلمىستى ادەيى جاساماعانىن» ايتىپ، ەرتەڭىندە اپەللياتسيالىق شاعىمى قارالعانعا دەيىن بوساتىلعان.