ساۋد ارابياسىنىڭ سولتۇستىگىندە وڭىردە بۇرىن-سوڭدى بولماعان ءىرى كولەمدەگى اسكەري جاتتىعۋ باستالدى. saudigazette.com.sa سايتىنىڭ حابارلاۋىنا قاراعاندا جاتتىعۋعا 20 ەلدىڭ اسكەرلەرى قاتىسىپ جاتىر.

ساۋد ارابياسى، بىرىككەن اراب امىرلىكتەرى، يوردانيا، باحرەين، سەنەگال، سۋدان، تۇركيا، كۋۆەيت، ماروككو، پاكىستان، تۋنيس، كاتار، مالايزيا، مىسىر سىندى 20 مەملەكەتتىڭ اسكەرلەرى «سولتۇستىك داۋىلى» جاتتىعۋىن باستاعان. قىتايدىڭ CCTV-News اگەنتتىگى اسكەري جاتتىعۋعا 200 مىڭ جاۋىنگەردىڭ قاتىسىپ جاتقانى تۋرالى حابارلادى.

«يسلام اسكەرى» دەپ اتالاتىن كواليتسياعا كىرگەن ەلدەر جاتتىعۋعا 100 دەن استام ۇشاق، 100 دەن استام تانك پەن كوپتەگەن تەحنيكا قاتىستىرىپ جاتىر. مۇنداي ءىرى كولەمدەگى جاتتىعۋ وڭىردە بۇرىن بولماعان كورىنەدى. ساراپشىلار بۇل جاتتىعۋدى ساۋد ارابياسى باستاعان كواليتسيانىڭ يران مەن سيريا بيلىگىنە كورسەتكەن قىرى رەتىندە باعالاپ وتىر. ال، ساۋد ارابياسىنىڭ رەسمي بيلىگى بۇل جاتتىعۋدى ايماقتاعى بەيبىتشىلىك پەن تۇراقتىلىقتى ساقتاۋعا باعىتتالعان شارا رەتىندە اتاپ وتكەن.