تاۋلى قاراباق ايماعىندا وتە كۇردەلى جاعداي قالىپتاسىپ وتىر. سەنبى كۇنى تەلەارنادان سويلەگەن ارمەنيا پرەزيدەنتى سەرج سارگسيان سول كۇنى بولعان قارۋلى قاقتىعىستاردان ارمەنيالىق 18 اسكەري قازا تاۋىپ، 35-ءى جارالانعانى تۋرالى مالىمدەدى. ازەربايجان سىرتقى ىستەر مينيسترلىگى رەسمي مالىمدەمەسىندە 12 اسكەري قىزمەتشىسى مەرت بولعانى، مي-24 اسكەري تىكۇشاعى مەن ميناعا تۇسكەن ءبىر اسكەري تانكتەن ايىرىلعانى ايتىلعان. ەكى تاراپ تا قارۋلى قاقتىعىسقا ءبىر-ءبىرىن ايىپتاپ جاتىر.

ەۋروپاداعى قاۋىپسىزدىك جانە ىنتىماقتاستىق ۇيىمىنىڭ تاۋلى قاراباق بويىنشا مينسك توبى تەڭتوراعالارى – اقش، رەسەي جانە فرانتسيا داۋلى ايماقتاعى جاعدايعا بايلانىستى الداعى اپتادا ۆەنادا شۇعىل جيىن وتكىزبەك.

ەۋروپا وداعىنىڭ سىرتقى ساياسات جونىندەگى جوعارى وكىلى فەدەريكا موگەريني مەن گەرمانيا سىرتى ىستەر ءمينيسترى باكۋ مەن ەرەۆاندى اسكەري ءىس-قيمىلداردى دەرەۋ توقتاتىپ، بەيبىتشىلىك ورناتۋعا شاقىردى.

تاۋلى قاراباق ايماعىنداعى ەكى تاراپ اراسىنداعى سىزىق بويىندا سەنبىگە قاراعان ءتۇنى اتىس ۇدەپ كەتكەن. ارمەنيا «سىزىقتان ءوتىپ، شابۋىل جاسادى» دەپ ازەربايجاندى ايىپتايدى. باكۋ ارمەنيالىق اسكەريلەر «اتقىلاۋدى ءبىرىنشى بولىپ باستادى» دەپ مالىمدەگەن.

ءساۋىردىڭ 1-ءى كۇنى ۆاشينگتوندا اقش ۆيتسە-پرەزيدەنتى دجو بايدەن ارمەنيا جانە ازەربايجان پرەزيدەنتتەرىمەن كەزدەسىپ، ەكى تاراپتى داۋلى ايماققا قاتىستى ماسەلە شەشىمىن بەيبىت جولمەن تابۋعا شاقىرعان.

نەگىزىنەن ارمياندار كوپ قونىستانعان تاۋلى قاراباق اۆتونوميالىق وبلىسى 1988 جىلى ازەربايجان قۇرامىنان شىعاتىنى تۋرالى مالىمدەگەننەن كەيىن، داۋلى ماسەلەنىڭ سوڭى ارمەنيا مەن ازەربايجان اراسىندا قارۋلى جانجالعا ۇلاسقان. 1992-1994 جىلدارى ارالىعىندا بولعان اسكەري ءىس-قيمىلداردان سوڭ ازەربايجان تاۋلى قاراباققا باقىلاۋدان ايرىلىپ قالعان. حالىقارالىق بىتىمگەرلەردىڭ قاتىسۋىمەن 1994 جىلى ارمەنيا مەن ازەربايجان اراسىندا اتىستى توقتاتۋ تۋرالى كەلىسىم جاسالعان. الايدا، سوعان قاراماستان، داۋلى ايماقپەن شەكتەسەتىن سىزىق بويىندا وقتا-تەكتە اتىس بولىپ قالاتىن ەدى.

ازات ەۋروپا / ازاتتىق راديوسى