تۇركيا رەسەيدىڭ رەسمي اگەنتتىگى سايتىن بۇعاۋلادى
تۇركيا بيلىگى رەسەيدىڭ مەملەكەتتىك “سپۋتنيك” اگەنتتىگىنىڭ ۆەب-سايتىن بۇعاۋلادى. “سپۋتنيكتىڭ” تۇركياداعى ءبولىمىنىڭ رەداكتورى ماحير بوزتەپەنىڭ 15 ساۋىردە Twitter-دە حابارلاۋىنشا، تۇركيالىق قولدانۋشىلار اگەنتتىكتىڭ تۇرىك تىلىندەگى عانا ەمەس، وزگە 31 تىلدەگى ۆەب-سايتىنا تۇگەل كىرە الماي قالعان.
بۇل اقپاراتقا قاتىستى تۇركيانىڭ تەلەكوممۋنيكاتسيالىق، يا ينتەرنەت قىزمەتىن رەتتەۋ اگەنتتىگى تارابىنان ازىرشە ەشقانداي رەسمي تۇسىنىكتەمە بەرىلمەدى.
14 ساۋىردە رەسەي پرەزيدەنتى ۆلاديمير پۋتين ماسكەۋدە تىكەلەي ەفير ارقىلى تۇرعىندار ساۋالىنا جاۋاپ بەرگەنىندە تۇركيا باسشىلارىن “تەرروريستەرمەن كۇرەسۋدەن گورى ولارمەن ىنتىماقتاسىپ وتىر” دەپ ايىپتاعان. ول “تۇركيانى دوسىمىز دەپ سانايمىز، بىراق اقىلعا قونىمسىز ءىس ىستەيتىن كەيبىر ساياساتكەرلەرىمەن قاتىناسىمىز ناشار” دەگەن. پۋتين بۇعان قوسا تۇركيانى ء“ىس جۇزىندە ازامات سوعىسى جاعدايىندا تۇرعان مەملەكەت” دەپ، بۇل ەلگە ساپارلاۋدى “رەسەيلىكتەر ءۇشىن قاۋىپسىز ەمەس” دەگەن.
ەكى ەل قارىم-قاتىناسى 2015 جىلى تۇركيا سيريامەن شەكاراسىندا رەسەيلىك سۋ-24 اسكەري ۇشاعىن اتىپ تۇسىرگەن سوڭ ناشارلاعان. بۇل وقيعادان سوڭ پۋتين تۇركياعا سانكتسيالار سالىپ، ەكى ەل اراسىنداعى ساۋدا-ساتتىق كۇرت تومەندەگەن.
سوڭعى ايلاردا تۇركيادا بىرنەشە وپپوزيتسياشىل باسىلىمدار تەرروريزم كۇدىگىمەن ءتىنتىلىپ، يا جابىلعان. قۇقىق قورعاۋ ۇيىمدارى مەن تۇركيالىق اقپارات قۇرالدارى تۇركياداعى “بيلىككە وپپوزيتسيالىق پىكىردەگىلەردىڭ قۋدالانعانىن” ايىپتايدى.
ازات ەۋروپا / ازاتتىق راديوسى
پىكىر قالدىرۋ