ءبىزدىڭ كونستيتۋتسيامىز «ءبىز، ورتاق تاريحي تاعدىر بىرىكتىرگەن قازاقستان حالقى، بايىرعى قازاق جەرىندە مەملەكەتتىلىك قۇرا وتىرىپ…» دەپ باستالادى. بىرلىكتىڭ نەگىزى وسى سوزدەردە تۇيىندەلگەن. ءبىز 25 جىل بويى تەڭ ءارى تەڭقۇقىلى ادامداردىڭ مەملەكەتىن قۇرىپ جاتىرمىز. بۇعان اسىرەسە داعدارىس جاعدايىندا قول جەتكىزۋ وڭاي بولعان جوق، – دەدى قازاقستان پرەزيدەنتى.

نۇرسۇلتان نازارباەۆ ەلىمىزدىڭ قالىپتاسۋى مەن دامۋى ءۇشىن تۇتاستىقتىڭ ماڭىزدى ەكەنىن اتاپ ءوتتى.

بىرلىكتىڭ ارقاسىندا ءبىزدىڭ حالقىمىز وراسان جەر اۋماعىن ساقتاپ قالدى، تاۋەلسىزدىككە قول جەتكىزدى، نارىقتىق ەكونوميكا قالىپتاستىردى. ءبىز قىسقا ۋاقىت ىشىندە وزگە مەملەكەتتەر جەتە الماعان تابىستارعا جەتتىك. بۇكىل الەم قازاقستاندى تانىدى، ءبىزدىڭ پىكىرىمىزدى حالىقارالىق قوعامداستىق تىڭدايدى، ەلىمىزدە كوپتەگەن مەملەكەتتەردىڭ قاتىسۋىمەن ءىرى سامميتتەر وتكىزىلەدى، بىزگە سەنەدى جانە سىيلايدى، ءبىز قاقتىعىستاردا ارااعايىندىق جاسايمىز. قازاقستان – تاتۋلىق پەن تىنىشتىق مەملەكەتى، بىزدەن وسىنى ۇيرەنەدى. مەن سىزدەردىڭ ارالارىڭىزدان شىقتىم جانە پرەزيدەنت بولعانىما قاراماستان، ۇلى حالقىمىزدىڭ قولداۋىنسىز وسىنىڭ بارىنە قول جەتكىزە الماس ەدىم، – دەدى مەملەكەت باسشىسى.

قازاقستان پرەزيدەنتى رەسپۋبليكامىزدا ءومىردىڭ بارلىق سالاسىندا جاسالىپ جاتقان جاعدايلارعا نازار اۋداردى.

ماسەلەن، جاستاردىڭ الەمدەگى ەڭ ۇزدىك ۋنيۆەرسيتەتتەردە وقۋى قامتاماسىز ەتىلدى، مەكتەپتەر مەن اۋرۋحانالار سالىندى. قازاقستاندىقتاردىڭ ءومىر جاسى 64-تەن 72 جاسقا دەيىن ۇزاردى، بۇل ماڭىزدى كورسەتكىشتەردىڭ ءبىرى سانالادى. سونىمەن قاتار، ەكونوميكانى دامىتۋعا ارنالعان رەزەرۆتەر الدىن الا قاراستىرىلدى. قازىرگى ۋاقىتتا كولىك-لوگيستيكا ينفراقۇرىلىمى قارقىندى سالىنىپ جاتىر. مەملەكەت تاراپىنان شاعىن جانە ورتا بيزنەسكە، اۋىل شارۋاشىلىعىنا كومەك كورسەتىلۋدە.

مەملەكەت باسشىسى الدىمىزدا جاڭا مىندەتتەر تۇرعانىن ايتتى.

ەلىمىزدە تىنىشتىق سالتانات قۇرىپ وتىر. ءبىزدىڭ ءبىرتۇتاس ۇلتىمىز بارلىق مەيرامدى بىرگە مەرەكەلەيدى. مەن حالقىمدى ءدال وسى قالىپتا كورگىم كەلەدى جانە سول ءۇشىن بار ءبىلىمىم مەن تاجىريبەمدى جۇمساپ كەلەمىندا . ءبىز كوزدەگەن ماقساتتارىمىزعا – ازاماتتاردىڭ بۇدان جاقسى ومىرىنە مىندەتتى تۇردە قول جەتكىزەمىز. ول ءۇشىن جاستارىمىز ءبىزدىڭ تاۋەلسىز جولىمىزدى تاباندى تۇردە جالعاستىرىپ، كوزدىڭ قاراشىعىنداي قورعاۋى، ەلدەگى بىرلىكتى، دوستىق پەن تىنىشتىقتى ساقتاۋى قاجەت. بۇل – ءار ادامنىڭ مىندەتى، – دەدى قازاقستان پرەزيدەنتى.

سوڭىندا نۇرسۇلتان نازارباەۆ  بارشا قازاقستاندىقتارعا دەنساۋلىق، باق-بەرەكە جانە يگىلىك تىلەدى.