سۋرەتتەر سويلەيدى

ۇلانباتىردا قازاق ۇشقىشى، موڭعوليا اۋە كۇشتەرىنىڭ باس قولباسشىسى م.زايسانوۆتى ەسكە الدى (فوتو)

kerey.kz

 |  May 10, 2016

7 مامىردا ۇلانباتىر قالاسىندا قازاقستان ەلشىلىگى وتان قورعاۋشىلار كۇنى مەرەكەسىنە وراي جانە جەڭىس كۇنى قارساڭىندا موڭعوليانىڭ اتاقتى قازاق ۇشقىشى، موڭعوليا اۋە كۇشتەرىنىڭ باس قولباسشىسى، گەنەرال-مايور ءمۇدارىس زايسانوۆتىڭ قۇلپىتاسىنا گۇل شوقتارىن قويۋ ءراسىمىن وتكىزدى.

گۇل قويۋ راسىمىنە قازاقستان رەسپۋبليكاسىنىڭ موڭعولياداعى ەلشىسى قالىبەك قوبلاندين، موڭعوليا پارلامەنتىنىڭ دەپۋتاتتارى تىلەيحان المالىق، باكەي اعىپار، جازۋشى، موڭعوليانىڭ بەلگىلى قوعام قايراتكەرى سۇلتان تاۋكەيۇلى جانە موڭعوليانىڭ ەڭبەك سىڭىرگەن ۇشقىشى، وتستاۆكاداعى پودپولكوۆنيك ءتاشتۋان توتەيۇلى قاتىستى.

ءمۇدارىس زايسانوۆ – موڭعوليا قارۋلى كۇشتەرىندە قىزمەت اتقارعان قازاق ازاماتى، گەنەرال-مايور. 1910 جىلى زايسان وڭىرىندە تۋىلىپ،  1920 جىلدارى مونعولياعا قونىس اۋدارعان. 1932 جىلى ورىنبورداعى  ۇشقىشتار دايارلايتىن ۋچيليششەنى تامامداعان. حالحين-گول شايقاسى كەزىندەگى ەرلىكتەرى ءۇشىن موڭعوليانىڭ جانە كەڭەس وداعىنىڭ  ەڭ جوعارعى ناگرادالارىنىڭ ءبىرى – «قىزىل تۋ» وردەنىمەن ماراپاتتالىپ، 1942 جىلى گەنەرال-مايور شەنىندە  موڭعوليا اۋە اسكەرلەرىنىڭ باس قولباسشىسى لاۋازىمىنا تاعايىندالعان. زايسانوۆ 57 جاسىندا ۇلانباتىرداعى اسكەري گوسپيتالدا دۇنيە سالدى.

قازاقپارات