قارجى مينيسترلىگى وفشورلار تىزىمىندە قازاقستاندىقتاردىڭ بولۋىن زەرتتەپ جاتىر. بۇل تۋرالى Tengrinews.kz تىلشىسىنە قر قارجى مينيسترلىگى مەملەكەتتىك كىرىس كوميتەتىنىڭ رەسمي وكىلى جامبىل سۇراعانوۆ حابارلادى.

“بىزدە اقپارات بار. قازىر مالىمەتتەر بازاسىنا سايكەس زەرتتەۋ جۇمىستارى ءجۇرىپ جاتىر. زەرتتەۋدىڭ ناتيجەسىنە بايلانىستى شەشىمدەر قابىلدانادى. بۇدان ءبىزدىڭ حابارىمىز بار، جۇمىس ىستەپ جاتىرمىز”، – دەدى سۇراعانوۆ.

جۋرناليستىك تەرگەۋلەردىڭ حالىقارالىق كونسورتسيۋمى (ICIJ) 9 مامىردا پانامالىق Mossack Fonseca زاڭگەرلىك فيرماسىنىڭ 200 مىڭنان اسا كليەنتى جايلى مالىمەتى بار تولىق مالىمەتتەر بازاسىن جاريا ەتتى.

پارلامەنتتەگىلەر قازاقستاندىقتاردىڭ داۋلى وفشورلار تىزىمىندە بار بولىپ شىعۋىنا قاتىستى پىكىر ايتقان ەدى.

جالپى وتىرىستا “اق جول” فراكتسياسىنىڭ دەپۋتاتى ازات پەرۋاشەۆ وسى تاقىرىپقا بايلانىستى پرەمەر-مينيستر كارىم ماسىموۆكە ساۋالىن وقىدى. “بيىلعى ساۋىردە جۋرناليستىك تەرگەۋلەردىڭ حالىقارالىق كونسورتسيۋمى الەم بويىنشا كاسىپكەرلەر مەن شەنەۋنىكتەردىڭ وفشورلىق كەستەسىن قولدانۋىنىڭ مالىمەتتەرىن جاريا ەتتى. بۇل وقيعالار “پانامالىق داۋ” دەگەن اتاۋعا يە بولدى، سەبەبى وعان پانامالىق ءىرى زاڭگەرلىك كومپانيا نەگىز بولدى. وفشور ايماقتارى سالىق سالۋدى جەتىلدىرۋدە عانا قولدانىلمايتىنى بەلگىلى، سونىمەن قاتار، بيۋدجەت قاراجاتىن جىمقىرۋ مەن جەمقورلىق ءۇشىن دە قولدانىلادى. وسىعان بايلانىستى جوعارى لاۋازىمدى مەملەكەتتىك قىزمەتكەرلەردىڭ وفشور ەسەپشوتتارىنىڭ بولۋى تۋرالى مالىمەت كوپتەگەن ەلدە شۋ شىعاردى. يسلانديانىڭ پرەمەر-ءمينيسترى وتستاۆكاعا كەتتى، ال ۇلىبريتانيانىڭ پرەمەر-ءمينيسترى باسپاسوزگە تۇسىنىك بەرۋگە ءماجبۇر بولدى”، – دەدى دەپۋتات.

قازاقستاندىقتاردىڭ ءتىزىمىن مىنا جەردەن كورۋگە بولادى.

Browse by country Kazakhstan