ءمينيستردىڭ ايتۋىنشا، زيالى قاۋىم وكىلدەرى ءبىلىم جانە عىلىم ءمينيسترى ەرلان ساعاديۆتەن اتالعان وزگەرىستەردى اسىقپاي ەنگىزۋدى جالىنىپ تۇرىپ سۇراعان، دەپ حابارلايدى baq.kz تىلشىسى.
«ءتىل ساياساتىن دامىتۋ وڭاي ەمەس. شىنىن ايتۋ كەرەك، جەر ماسەلەسى قوزعالاردىڭ الدىندا ءۇش تىلدىككە قاتىستى قوزعالىس بولعان. سول كەزدەن باستاپ ءوزىمىز يكەمسىز قيمىلىمىزبەن حالىقتىڭ كوڭىلىن ءبىرشاما وزگەرتىپ الدىق دا، ونىڭ ۇستىنە جەر تۋرالى كودەكستى كىرگىزدىك. سونىمەن قازىر مۇلدەم ىڭعايسىز جاعدايدا وتىرمىز»، – دەدى مينيستر بۇگىن مادەنيەت جانە سپورت جونىندەگى قوعامدىق كەڭەستىڭ وتىرىسىندا.
ءمينيستردىڭ ايتۋىنشا، بۇعان دەيىن زيالى قاۋىم وكىلدەرى ءۇش ءتىلدى وقىتۋ جۇيەسىمەن اسىقپاۋدى سۇراعان. «ءبىر جينالىس بولدى، شىنى كەرەك. مىنە، مىرزاتاي (جولداسبەكوۆ – اۆت.) اعامىز وتىردى، نۇرلان ورازالين وتىردى. مەنىڭ كوللەگام ء(بىلىم جانە عىلىم ءمينيسترى ەرلان ساعاديەۆ – اۆت.) وتىردى. (اعالالار – اۆت.) جالىنىپ تۇرىپ ايتتى، وسى ءۇش تىلدىكتى اسىقپايىقشى دەپ، قازاق ءتىلى مەن قازاق ادەبيەتىن ازىرشە قوسپايىقشى، تۇرا تۇرايىق دەپ. الدىمەن فيلولوگيانى رەتتەپ الايىق. ادەبيەتتى…بىر ساعات ەكەۋى ەكى جاقتان جالىندى. جوق، قويماي، ەندىگى اپتادا زاڭ قابىلدايمىن، سۇيتەم-بۇيتەم دەدى. قازىر ەندى كورىپ تۇرسىزدار، ەلباسى ءۇش تىلدىكتى دە توقتاتتى، 12 جىلدىق بار، جازدىق كانيكۋل بار. ارينە، ويى دۇرىس. بىراق سونى اقىلداسپاي شەشەمىن دەگەنى كەرى اسەرىن تيگىزىپ جاتىر»، – دەپ اتاپ كورسەتتى ا.مۇحامەديۇلى.