جەكسەنبى كۇنى اقتوبەدە قارۋلى شابۋىلدار بارىسىندا جالپى سانى التى ادام مەرت بولعانى تۋرالى بۇقارالىق اقپارات قۇرالدارىنا قازاقستان ىشكى ىستەر مينيسترلىگىنىڭ رەسمي وكىلى الماس سادۋباەۆ حابارلادى.

ونىڭ ايتۋىنشا، ماۋسىمنىڭ 5-ءى كۇنى قالاداعى «پاللادا» اتتى قارۋ ساتاتىن دۇكەنگە شابۋىل كەزىندە ساتۋشى قازا تاۋىپ، ءبىر ادام جارالانعان.

بۇدان سوڭ ۇلتتىق گۆارديا اسكەري ءبولىمى ورنالاسقان اۋدانداعى تاعى ءبىر قارۋ ساتاتىن دۇكەنگە شابۋىل جاسالعان. قارۋلى شابۋىل كەزىندە اسكەري ءبولىمنىڭ ءبىر وفيتسەرى مەن كەلىسىم-شارت نەگىزىندە قىزمەت اتقاراتىن ءبىر ادام قازا تاۋىپ، 9 اسكەري قىزمەتكەر جارالانعان.

– شابۋىل جاساعانداردىڭ بىرەۋى قولعا ءتۇسىپ، ۇشەۋى وققا ۇشتى، بىرەۋى جارالانعان. بىرنەشە قىلمىسكەر قورشاۋعا الىندى، بىرنەشەۋى ءىز جاسىرىپ ۇلگەردى. ولاردى ىزدەستىرىپ جاتىر، – دەپ حابارلادى سادۋباەۆ.

ۆكونتاكتە الەۋمەتتىك جەلىسىندە جاريالانعان بۇل سۋرەت 2016 جىلى 5 ماۋسىمدا اقتوبەدەگى اتىس كەزىندە تۇسىرىلگەن دەپ سيپاتتالعان.

ءىىم رەسمي وكىلى بۇل وقيعاعا ءداستۇرلى ەمەس ءدىني اعىم وكىلدەرىنىڭ قاتىسى بولۋى مۇمكىن دەگەن بولجام بارىن ايتادى. اقتوبە قالاسى بويىنشا تەرروريزمگە قارسى وپەراتسيا ءتارتىبى جاريالانعان. پوليتسيا تۇرعىندارعا ۇيدەن شىقپاۋعا كەڭەس بەرىپ، قىراعى بولۋعا شاقىرادى. قازاقستاننىڭ باتىسىنداعى اقتوبەمەن كورشى اتىراۋ وبلىسىنىڭ ورتالىعىندا دا باقىلاۋ كۇشەيتىلگەنى بايقالادى دەپ حابارلادى وسى ايماقتان ازاتتىق ءتىلشىسى.

جەرگىلىكتى «دياپازون» باسىلىمىنا كۋاگەرلەردىڭ ايتۋىنشا، اقتوبەدەگى اتىس تۇسكى ساعات ەكىنىڭ شاماسىندا باستالعان. بەلگىسىز بىرەۋلەر اقتوبەدەگى اڭشى قارۋىن ساتاتىن دۇكەندى توناعان. سونىمەن بىرگە، 24-30 جاس شاماسىنداعى ەر كىسىلەردىڭ اسكەري ءبولىم ماڭىندا ادامداردى كەپىلگە الىپ، قالاداعى پوليتسيا بولىمدەرىنىڭ بىرىنە شابۋىل جاسالعانى تۋرالى بەيرەسمي اقپارات تارادى.

بۇدان كەيىن قالادا ءۇش جەردە – بەسىنشى ىقشاماۋدان، فيلارمونيا ماڭى مەن «پاللادا» اڭشى قارۋىن ساتاتىن دۇكەن جانىندا ارنايى وپەراتسيا ءجۇرىپ جاتقانى تۋرالى حابارلار تارادى. اقتوبە وبلىستىق ىشكى ىستەر دەپارتامەنتى وكىلدەرى ازاتتىققا بۇگىنگى بولىپ جاتقان وقيعاعا بايلانىستى اقپارات بەرۋدەن باس تارتتى.

الەۋمەتتىك جەلى قولدانۋشىلارى اقتوبەدەگى اتىس تۋرالى تۇسىرىلگەن سۋرەتتەر جانە ۆيدەولارمەن ءبولىسىپ جاتىر. كەيبىر ۆيدەولاردا كوشەدە قولىنا قارۋ ۇستاعان ادامدار، پوليتسيا كولىگى قاسىندا جۇگىرىپ جۇرگەن الدەكىمدەر بايقالادى جانە قارۋدان اتقانعا ۇقسايتىن دىبىستار ەستىلەدى.

بۇدان بەس جىل بۇرىن اقتوبەدە قازاقستانداعى العاشقى تەررولىق اكت جاسالعان ەدى: 2011 جىلى مامىردىڭ 17-ءى كۇنى اقتوبە ۇلتتىق قاۋىپسىزدىك كوميتەتى دەپارتامەنتى عيماراتىندا ءوز-ءوزىن جارىپ جىبەرگەن 25 جاستاعى راحىمجان ماقاتوۆ ەسىمدى ازامات وقيعا ورنىندا قازا تاۋىپ، ءۇش ادام جارالانعان. بۇل وقيعادان كەيىن قازاقستاننىڭ بىرنەشە ايماعىندا – اقتوبە، اتىراۋ، استانا، الماتى، تارازدا قارۋلى شابۋىلدار بولعان. 2012 جىلى قازاقستاندا تەرروريزمگە قارسى جۇرگىزىلگەن بىرنەشە وپەراتسيا بارىسىندا «تەرروريستەر» دەگەن كۇدىككە ىلىنگەندەردىڭ كوبى وققا ۇشقان بولاتىن.

ازات ەۋروپا / ازاتتىق راديوسى