قىتاي ەلشىلىگىنە شابۋىلدى ەتنيكالىق ۇيعىر جاساعان
kerey.kz
قىرعىز بيلىگى “قىتاي ەلشىلىگىنە شابۋىلداعانداردى” انىقتادى-دەپ حابارلايدى اززاتتىق راديوسى.
بىشكەكتەگى قىتاي ەلشىلىگىنە شابۋىلدى ۇيىمداستىرىپ، جاسادى دەگەن كۇدىكتىلەر.
قىرعىز بيلىگى وتكەن ايدا بىشكەكتەگى قىتاي ەلشىلىگىندە ءوزىن جارىپ جىبەرگەن كۇدىكتى ەر ادامدى انىقتادى. قىرعىزستان مەملەكەتتىك ۇلتتىق قاۋىپسىزدىك كوميتەتىنىڭ (مۇقك) مالىمدەۋىنشە، شابۋىلدى زوير حاليلوۆ ەسىمدى 33 جاستاعى ەتنيكالىق ۇيعىر جاساعان. حاليلوۆتا تاجىكستان پاسپورتى بولعان جانە ول “شىعىس تۇركىستان يسلام قوزعالىسى” ۇيىمىنىڭ مۇشەسى بولعان.
30 تامىزدا بىشكەكتە قىتاي ەلشىلىگىندە جانكەشتى جارىلىس جاساپ، رەسمي مالىمەت بويىنشا ەلشىلىكتىڭ ءۇش قىزمەتكەرى جارالانعان. مالىمەتتەرگە قاراعاندا، جانكەشتى “ميتسۋبيسي دەليكا” كولىگىمەن ەلشىلىكتىڭ باتىس جاعىنداعى بروندالعان قاقپاسىن سوعىپ كىرىپ، جارىلىس قۇرىلعىسىن ىسكە قوسقان. جارىلىستان جانكەشتىنىڭ كولىگى تالقان بولىپ، تەحنيكا قالدىقتارى جان-جاققا شاشىلعان، جەنكەشتىنىڭ دەنەسى دە بىرنەشە بولىككە ءبولىنىپ كەتكەن.
مۇقك مالىمەتىنە قاراعاندا، قىلمىس جاساۋدى دايىنداۋعا قاتىسى بار دەگەن كۇدىكپەن قىرعىزستان مەن وزبەكستاننىڭ بەس ازاماتى ۇستالعان. تاعى ءتورت قىرعىزستاندىققا حالىقارالىق ىزدەۋ جاريالانعان. ارنايى قىزمەت تەراكتىنى سيريادا يسلامشىل سودىرلارمەن بىرگە سوعىسىپ جۇرگەن بىرنەشە ۇيعىر تەرروريستىك توپتارى ۇيىمداستىرعان دەيدى.
پىكىر قالدىرۋ