32 جاستاعى قانات يسلام بۇل جەكپە-جەككە جاتتىقتىرۋشىسى نەلسون لوپەسپەن بىرگە الماتىداعى AIBA (حالىقارالىق اۋەسقوي بوكسفەدەراتسياسى) بوكس اكادەمياسىندا جاتتىعادى. بوكسشىنىڭ ايتۋىنشا، وعان سپاررينگ قارسىلاس رەتىندە قازاقستاندىق جانقوش تۇراروۆ پەن 2013 جىلعى الەم چەمپيونى، ريو وليمپياداسىنىڭ قاتىسۋشىسى جانىبەك ءالىمحانۇلى كومەكتەسپەك.

– بۇل كەزدەسۋگە ەكى ايدان بەرى دايىندالىپ جاتىرمىن. قىتايدان دا ءتۇرلى كومپانيالار ۇسىنىس جاساپ، كەزدەسۋ وتكىزگىسى كەلدى. بىراق ازياعا كەلگەن سوڭ الماتىدا نەگە وتكىزبەسكە دەپ ويلادىم. ولاردىڭ ۇسىنىسى كوڭىلىمنەن شىقپادى. اللوتەي – مىقتى قارسىلاس. ونى العاشقى راۋندتاردا قۇلاتامىن دەپ تە ۋادە بەرە المايمىن. بىراق جەڭىسكە جەتۋگە بارىمدى سالامىن، – دەيدى بوكسشى.

قانات يسلامنىڭ قارسىلاسى گانالىق 25 جاستاعى بوكسشى پاتريك اللوتەي كاسىپقوي رينگتە 36 كەزدەسۋ وتكىزىپ، 34 كەزدەسۋدە جەڭىسكە جەتكەن، ەكى كەزدەسۋدە جەڭىلگەن. ال قانات يسلام كاسىپقوي رينگتە 21 كەزدەسۋ وتكىزىپ، بارلىعىندا جەڭىسكە جەتكەن. ول 19 جەكپە-جەكتى ۋاقىتىنان بۇرىن اياقتاعان.

قازاننىڭ 29-ىنداعى كەزدەسۋدە جەڭىسكە جەتكەن بوكسشى سۋپەر ورتا سالماقتا (69 كگ – رەد) WBO (الەمدىك بوكس ۇيىمى) تۇجىرىمى بويىنشا قۇرلىقارالىق چەمپيون جانە IBO (حالىقارالىق بوكس ۇيىمى) تۇجىرىمى بويىنشا حالىقارالىق چەمپيون اتاعىن الادى. ال قانات يسلام WBA Fedelatin نۇسقاسى بويىنشا امەريكا ايماعى چەمپيونى اتاعىن قورعاۋى ءتيىس.

– قانات يسلام قازىر WBC (الەمدىك بوكس كەڭەسى) رەيتينگىسىندە 5-ورىندا تۇر. ەگەر اللوتەيدى جەڭسە رەيتينگتە ۇزدىك ۇشتىككە ەنەدى. بۇل رەيتينگ قانات يسلامعا كەز كەلگەن ۋاقىتتا الەم چەمپيونى اتاعىن تالاسۋىنا مۇمكىندىك بەرەدى، – دەيدى قانات يسلامنىڭ دەمەۋشىلەرىنىڭ ءبىرى باۋىرجان وسپانوۆ.

«قاناتتى الەم چەمپيونى ەتكىم كەلەدى»

قانات يسلامنىڭ پروموۋتەرى ءارى جاتتىقتىرۋشىسى امەريكالىق نەلسون لوپەس «اللوتەي قانات يسلامنىڭ كارەراسىنداعى مىقتى قارسىلاس بولماق» دەپ باعالادى.

– قازاقستاندىق بوكسشىلارمەن 15 جىلدان بەرى جۇمىس ىستەپ كەلە جاتىرمىن. ال قانات يسلامدى جەتى جىل جاتتىقتىرىپ ءجۇرمىن. ماقساتىم – قانات يسلامدى الەم چەمپيونى ەتىپ شىعارۋ. قازىرگى بار ويىمىز پاتريك اللوتەيمەن وتەتىن كەزدەسۋدە. وسى جەكپە-جەكتە جەڭىسكە جەتسەك الدا الەم چەمپيونى اتاعىنا تالاسۋ ءۇشىن كەلىسسوزدەر جۇرگىزەمىز، – دەدى ول ازاتتىق تىلشىسىنە.

قانات يسلامنىڭ پروۋموۋتەرى نەلسون لوپەس ءباسپاسوز ءماسليحاتىندا. الماتى، 23 قىركۇيەك 2016 جىل.

قانات يسلام وسىعان دەيىن ازاتتىققا بەرگەن سۇحباتتارىندا 21 كەزدەسۋدىڭ بارلىعىندا اقى الماعانىن ايتقان. الماتىدا وتەتىن كەزدەسۋدە ول العاش رەت جەكپە-جەك وتكىزگەنى ءۇشىن سىياقى الماق.

– گونارار بولادى. بىراق قانشا بولاتىنى، قالاي بولاتىنىن پروموۋتەرلەرىم قۇپيا ساقتاپ وتىر. قازاقستاندا كاسىپقوي بوكستىڭ دەڭگەيىن كوتەرگىم كەلەدى. سوندىقتان الماتىدا جەكپە-جەك وتكىزسەم دەگەن ماقسات ءۇشىن كوپ جۇمىس ىستەدىك، – دەيدى بوكسشى.

قانات يسلام بۇل كەزدەسۋدەن كەيىن جىل سوڭىنا دەيىن امەريكا قۇرلىعىندا تاعى ءبىر جەكپە-جەك وتكىزۋدى جوسپارلاپ وتىر. ول 2017 جىلى «كەم دەگەندە ءتورت كەزدەسۋ وتكىزسەم» دەيدى.

قانات يسلام مەن پاتريك اللوتەي اراسىنداعى كەزدەسۋ 13 مىڭ ورىندىق “الماتى ارەنا” سپورت كەشەنىندە وتەدى. بيلەتتەر قازان ايىنان باستاپ ساتىلىمعا شىقپاق. ۇيىمداستىرۋشىلاردىڭ ايتۋىنشا، «بيلەت ستۋدەنتتەر دە دە، قاراپايىم حالىق تا الا الاتىنداي بولادى».

قانات يسلامنىڭ دجوناتان باتيستانى (دومينيكان) جەڭگەن كەزى. مايامي، 7 قاراشا 2015 جىل.

قانات يسلام سوڭعى رەت مامىردىڭ 9-ىندا فلوريدا شتاتىندا كولۋمبيالىق حۋان دە انحەلمەن كەزدەسىپ، التىنشى راۋندتا جەڭىسكە جەتكەن.

قىتايدا تۋعان قانات يسلام سول ەلدىڭ اتىنان پەكين وليمپياداسىنا قاتىسىپ، قولا مەدال يەلەنگەن. پەكين وليمپياداسىنان كەيىن ول قازاقستانعا قونىس اۋدارعان. قانات يسلام 2012 جىلعى لوندون وليمپياداسىنا قازاقستان اتىنان قاتىسپاق بولعان كەزدە ازاماتتىق-قۇقىقتىق داۋ تۋعان سوڭ كاسىپقوي بوكسقا بەت بۇرعان. كەيىن ماياميگە (اقش) بارىپ، نەلسون لوپەستىڭ پروۋموۋتەرلىك كومپانياسىمەن كەلىسىم-شارت جاساسقان. قازىر قانات يسلامنىڭ بارلىق كەزدەسۋىن وسى كومپانيا ۇيىمداستىرىپ ءجۇر. قازاقستاندا قۇرىلعان «استانا» پرەزيدەنتتىك كلۋبى قانات يسلامدى ءوز قۇرامىنا الىپ، دەمەۋشىلىك كورسەتپەك بولعان. بىراق، بوكسشىنىڭ ايتۋىنشا، ەكى تاراپ ورتاق كەلىسىمگە كەلە الماعان.

ازات ەۋروپا / ازاتتىق راديوسى