قازاقستاندا بيلىك تارماقتارى اراسىندا وكىلەتتىلىكتەردى ءبولۋ ماسەلەلەرى بويىنشا كونستيتۋتسياعا ەنگىزۋگە ۇسىنىلعان وزگەرىستەر جونىندەگى زاڭ جوباسى جاريالاندى.

رەسمي باق-تا جاريالانعان زاڭ جوباسىندا كونستيتۋتسياعا پرەزيدەنتتىڭ قانداي وكىلەتتىكتەرى ۇكىمەت پەن پارلامەنتكە بەرىلمەك ەكەنى كورسەتىلگەن. جوبا بويىنشا، الدىمەن پرەزيدەنتتىڭ الەۋمەتتىك-ەكونوميكالىق پروتسەستەردى رەتتەۋدەگى ءبىرشاما وكىلەتتىكتەرى ۇكىمەتكە جانە باسقا دا اتقارۋشى ورگاندارعا بەرىلەدى.

ۇسىنىلعان وزگەرىستەردە پرەزيدەنتتىڭ پرەمەر-ءمينيستردى پارلامەنت ءماجىلىسىنىڭ ماقۇلداۋىمەن تاعايىنداپ، ورنىنان الاتىنى، ۇكىمەت قۇرامىن پرەمەر ۇسىنىپ، ول ءماجىلىستىڭ ماقۇلداۋىمەن جاساقتالاتىنى، تەك سىرتقى ىستەر ءمينيسترى مەن قورعانىس ءمينيسترىن پرەزيدەنت تاعايىنداپ، ورنىنان الاتىنى ايتىلعان.

جوبادا ۇكىمەتتىڭ مەملەكەتتىڭ الەۋمەتتىك-ەكونوميكالىق ساياساتىنىڭ نەگىزگى باعىتتارىن، قورعانىس، قاۋىپسىزدىك، قوعامدىق ءتارتىپتى قامتاماسىز ەتۋدى ايقىنداپ، ىسكە اسىراتىنى، پرەزيدەنتتىڭ كەلىسىمىمەن مەملەكەتتىك باعدارلامالاردى بەكىتىپ، ولاردىڭ ورىندالۋىن قامتاماسىز ەتەتىن ايتىلعان. ۇكىمەتكە سونىمەن قاتار ۇكىمەت قۇرامىنا كىرمەيتىن ورتالىق اتقارۋ ورگاندارىن قايتا قۇرۋ، جويۋ، ولاردىڭ باسشىلارىن تاعايىنداپ، ورنىنان بوساتۋ وكىلەتتىلىگى بەرۋ قاراستىرىلعان.

كونستيتۋتسياعا ەنگىزىلەتىن وزگەرىستەر جوباسى بۇگىننەن باستاپ جالپىحالىقتىق تالقىلاۋعا ۇسىنىلدى. تالقىلاۋ 26 اقپانعا دەيىن جالعاسپاق.

قازاقستان پرەزيدەنتى نۇرسۇلتان نازارباەۆ بيلىك ءبولىنىسى ماسەلەسىنە قاتىستى ءتيىستى زاڭدار مەن كونستيتۋتسياعا وزگەرىس ەنگىزۋ قاجەتىن العاش ەل تاۋەلسىزدىگىنىڭ 25 جىلدىعىنا ارنالعان سالتاناتتى جيىندا، 2016 جىلى 15 جەلتوقساندا ايتقان ەدى.

ازات ەۋروپا / ازاتتىق راديوسى