شقو ءماسليحاتى حاتشىسىنىڭ قوس ازاماتتىعى تۋرالى دەرەك تەكسەرىلىپ جاتىر، – دەپ حابارلايدى Tengrinews.kz تىلشىسى شىعىس قازاقستان وبلىسى اكىمىنىڭ ءباسپاسوز قىزمەتىنە سىلتەمە جاساپ.

“شىعىس قازاقستان وبلىستىق ءماسليحاتىنىڭ حاتشىسى ۆ.م. گولوۆاتيۋكتە قازاقستان رەسپۋبليكاسى مەن رەسەي فەدەراتسياسىنىڭ قوس ازاماتتىعى بار بولۋى تۋرالى قازاقستاندىق ينتەرنەت-رەسۋرستاردا ورنالاستىرىلعان اقپارات بويىنشا 2017 جىلدىڭ 25 قاڭتارىندا وبلىس اكىمدىگىندە ءوڭىردىڭ قۇقىق قورعاۋ ورگاندارىنىڭ قاتىسۋىمەن كەڭەس ءوتىپ، وندا اتالمىش ماسەلە بويىنشا بۇرىنعى جۇمىس تۋرالى اقپارات تىڭدالدى”، – دەلىنگەن حابارلامادا.

سونىمەن قاتار، كەڭەستىڭ قورىتىندىسى بويىنشا كورسەتىلگەن فاكتىلەردى تەكسەرۋدى جالعاستىرۋ تۋرالى شەشىم قابىلدانعانى ايتىلادى.

ەسكە سالايىق، وسىعان دەيىن باق-تاردا ۆلاديمير گولوۆاتيۋكتىڭ رەسەيدىڭ جانە قازاقستاننىڭ ازاماتتىعى بار ەكەندىگى جايلى مالىمەت تاراعان بولاتىن. سول مالىمەت بويىنشا، گولوۆاتيۋك ۆلاديمير ميحايلوۆيچ دەگەن ازامات 1998 جىلدىڭ 12 تامىزىندا رەسەي فەدەراتسياسىنىڭ “ازاماتتىق تۋرالى” زاڭىنىڭ 3-بابىنىڭ تارتىبىندە رەسەيدىڭ استاناداعى ەلشىلىگىنىڭ كونسۋلدىعىندا رەسەي ازاماتتىعىن العان دەلىنەدى.

ال قازاقستاندا قوس ازاماتتىققا تىيىم سالىنعان. ايتا كەتەيىك، ۆلاديمير گولوۆاتيۋك شقو ءماسليحاتىنىڭ حاتشىسى قىزمەتىندە. ول 2016 جىلدىڭ ناۋرىزىندا قايتا سايلانعان بولاتىن.

Kaz.tengrinews.kz