ازات جىردىڭ ايبوزى
(اقىن ۇلاربەك دالەيۇلىنىڭ شىعارماشىلىعى حاقىندا) ازاتتىققا جەتۋ جولىندا ەلىن سۇيگەن ەرجۇرەك باتىرلار قانداي قىزمەت سىڭىرسە، التى اۋىز ءسوزى التى الاشقا جايىلعان ارقالى اقىن-جىراۋلار دا ودان كەم ەڭبەك ەتكەن جوق. تارلان تاريحتىڭ تەرەڭىنە سۇڭگىسەك، كونە دۇنيەدەگى «كۇلتەگىننىڭ كوك تاسىندا» ەرلىك پەن ەلدىك، بوداندىققا باس يمەۋ، بۇعالىققا باعىنباۋ سىندى ماسەلەلەر الدىڭعى كەزەكتە جىرلانادى. كونەنىڭ كۇمبىرىندەي بولىپ بۇگىندە امان-ەسەن ۇرپاعىمەن قاۋىشقان «كۇلتەگىن» جازۋىندا: «بەكتەردىڭ، حالقىنىڭ ءتۇزۋ ەمەستىگى ءۇشىن، تابعاش (قىتاي – ز.ك.) حالقىنىڭ الداۋىنا يلانعانى ءۇشىن، وتىرىگىنە كونگەنى ءۇشىن، ءىنىلى-اعالىنىڭ داۋلاسقانىنان، بەكتىڭ، حالىقتىڭ جاۋلاسقانىنان تۇركى حالقى ەلدىگىنەن ايىرىلدى. قاعاندىق قاعانىنان ايىرىلدى، تابعاش حالقىنا بەك ۇلدارى قۇل بولدى، سۇلۋ قىزدارى كۇڭ بولدى. تۇركى حالىقتارى تۇركى اتىن تاستاپ، تابعاش بەكتەرىنىڭ تابعاش اتىن ۇستاپ، تابعاش قاعانعا
