انكارا جارىلىستارعا بايلانىستى كۇردىستان جۇمىسشى پارتياسىنان سەزىكتەنەدى
ستامبۋلدىڭ ورتالىعىنداعى جارىلىس بولعان جەردە تۇرعان جەدەل جاردەم كولىكتەرى مەن ادامدار. 10 جەلتوقسان 2016 جىل. تۇركيا بيلىگى ستامبۋلدا سەنبىنىڭ كەشىندە بولعان جارىلىستاردى كۇردىستان جۇمىسشى پارتياسى ۇيىمداستىرعان بولۋى مۇمكىن دەپ كۇدىكتەنەدى. جارىلىستار سالدارىنان قازا تاپقان 38 ادامنىڭ 30-ى پوليتسيا قىزمەتكەرلەرى ەكەنى حابارلانعان. زارداپ شەككەن 150-دەن اسا ادام اۋرۋحانالاردا جاتىر. تۇركيا ۇكىمەتى ستامبۋلداعى جارىلىستار قۇرباندارىن ازا تۇتۋ كۇنىن جاريالاعان. جەلتوقساننىڭ 10-ى كۇنى كەشكىسىن تۇركيالىق «بەشىكتاش» جانە «بۋرساسپور» فۋتبول كوماندالارى اراسىندا وتكەن ويىننان كەيىن ستامبۋلداعى Vodafone Arena ستاديونى جانىندا ەكى جارىلىس بولعان. ساعات 22:30 كەزىندە ستاديون ماڭايىنداعى ءتارتىپتى قاداعالاۋعا قويىلعان پوليتسيا جاساعى وتىرعان اۆتوبۋستىڭ قاسىندا تۇرعان كولىككە ورناتىلعان مينا جارىلعان. ىلە-شالا ستاديون جانىنداعى ساياباقتا جانكەشتى ءوزىن جارىپ جىبەرگەن. ازات ەۋروپا / ازاتتىق راديوسى
