رەسەيدىڭ بۇۇ-داعى ەلشىسى “مەزگىلسىز ءولدى”
ۆيتالي چۋركين رەسەيدىڭ سىرتقى ىستەر مينيسترلىگى بۇۇ-داعى ەلشىسى ۆيتالي چۋركيننىڭ 65-كە قاراعان شاعىندا 20 اقپان كۇنى نيۋ-يوركتە مەزگىلسىز قايتىس بولعانىن حابارلادى. مينيسترلىك ديپلوماتتىڭ نەدەن ولگەنىن انىقتاپ حابارلاعان جوق، تەك مارقۇمنىڭ تۋىستارى مەن جاقىندارىنا كوڭىل ايتتى. تاسس اگەنتتىگى بۇۇ-نىڭ باس حاتشىسى انتونيۋ گۋتتەرەشتىڭ “جاي تۇسكەندەي بولدى” دەگەن ءسوزىن كەلتىرگەن. “رەيتەرز” اگەنتتىگىنىڭ جازۋىنشا، بۇۇ باس حاتشىسى كەڭسەسىنىڭ وكىلى فارحان حاق: “[چۋركين] ۇنەمى كوز الدىمىزدا ءجۇرۋشى ەدى. قايران قالدىم. وتباسىنا، دوستارى مەن ۇكىمەتىنە كوڭىل ايتامىز” دەگەن. چۋركين رەسەيدىڭ سىرتقى ساياساتىن بارىنشا قورعاۋعا تىرىسقان وكىل رەتىندە تانىلعان. ول بىلتىر سيريا پرەزيدەنتى باشار اسادقا قارسى وپپوزيتسيا جاساقتارىن ءبىرجولا تالقانداي ءۇشىن الەپپونى بومبالاۋدى جاقتاپ شىققان.
