سەرىك احمەتوۆتىڭ تۇرمەدەن ەرتە بوساۋىن تۇرلىشە بولجايدى
اسىلحان ماماشۇلى سەرىك احمەتوۆتىڭ پرەمەر-مينيستر كەزىندە تۇسكەن سۋرەتى. استانا، 24 قىركۇيەك 2012 جىل. قازاقستاننىڭ بۇرىنعى پرەمەر-ءمينيسترى، كوررۋپتسيالىق ايىپپەن سوتتالعان سەرىك احمەتوۆ قىركۇيەكتىڭ 21-ىندە بوستاندىققا شىقتى. ازاتتىق سويلەسكەن ساراپشىلار “قازاقستاندا زاڭ اركىمگە ارقالاي قولدانىلاتىنىن، ساياسي تۇتقىندارعا احمەتوۆكە جاسالعانداي راقىمشىلىق بولمايتىنىن” ايتادى. سەرىك احمەتوۆ قاراعاندى وبلىسىنداعى قاراباس كەنتىندەگى تۇرمەدەن قىركۇيەكتىڭ 21-ءى كۇنى تاڭەرتەڭ شىقتى. جەڭىل كۇرتەشە مەن قاراكوك دجينس شالبار كيگەن بۇرىنعى پرەمەردى ونداعان جۋرناليست پەن ۆيدەووپەراتور كۇتىپ الدى. جۋرناليستەرگە احمەتوۆتەن سۇحبات الۋدىڭ ءساتى تۇسپەدى، ول كولونيادان شىققان بەتتە قاسىنداعى قاراۋىل جىگىتتىڭ كومەگىمەن جول تالعامايتىن Toyota كولىگىنە ءمىنىپ كەتىپ قالدى. كولىككە قاراي ءجۇرىپ بارا جاتىپ ول جۋرناليستەرگە بولاشاقتا نە ىستەيتىنىن «ءالى جوسپارلاماعانىن»، دەنساۋلىعىنىڭ جاقسى ەكەنىن ايتىپ، «راحمەت سىزدەرگە!» دەپ قانا ءتىل قاتتى.
