گەرمانيادا «ۇلكەن جەتىلىك» ءسامميتى اشىلادى
ساياسي كاريكاتۋرا. اۆتورى – ەۆگەنيا ولەينيك. گەرمانيادا گارميش-پارتەنكيرحەن قالاسى ماڭىندا بۇگىن «ۇلكەن جەتىلىك» (G7) ءسامميتى باستالادى. بۇل سامميتكە رەسەي شاقىرىلماعان. ەكونوميكاسى دامىعان جەتى ەلدىڭ باسشىلارى ەكى كۇندىك سامميت بارىسىندا الەمدىك ەكونوميكا، كەدەيشىلىكپەن كۇرەس، عالامدىق كليمات وزگەرىسى، تەرروريزمگە قارسى كۇرەس سياقتى كەڭ اۋقىمدى حالىقارالىق پروبلەمالاردى تالقىلايدى دەپ جوسپارلانعان. سونىمەن بىرگە، بۇل سامميتتە ۋكراينانىڭ شىعىسىنداعى جانجال ايماعىندا احۋال شيەلەنىسىپ وتىرعان كەزدە باتىس ەلدەرىنىڭ رەسەيمەن قاتىناسى تۋرالى دا ءسوز بولماق. سەنبى كۇنى گارميش-پارتەنكيرحەن قالاسىندا G7 سامميتىنە قارسىلار وتكىزگەن شەرۋگە ءارتۇرلى ماقساتتى كوزدەيتىن قوزعالىس وكىلدەرى شىققان. ولاردىڭ اراسىندا كەدەيشىلىكپەن كۇرەسۋشى، بوسقىندار قۇقىعىن قورعاۋشى جانە تابيعات پەن جانۋارلاردى قورعاۋشى قوزعالىس وكىلدەرى بولعان. شەرۋشىلەر مەن پوليتسيا اراسىنداعى قاقتىعىستا ەكى جاقتان دا زارداپ شەككەندەر بار دەپ حابارلاندى.
