Qırküyek ayına josparlanğan şaralar ayasında 26 qırküyekte Şığıs Qazaqstan obılısı Jarma audanı Qalba tauı baurayında batırdıñ kesenesi ornatılıp, wlan-asır as beriledi. 29 qırküyek küni Astanada Baytaylaq batırğa arnalğan ğılımi-praktikalıq konferenciya ötedi jäne şetelden kelgen qazaq önerpazdarınıñ qatısuımen kölemdi koncert ötedi dep josparlanuda. Sonday-aq, osınday şaralar Almatı qalasında da jalğasın tabatın boladı. Qıtayda twratın belgili ğalım, qoğam qayratkeri Qadıs Janäbilwlınıñ bastamasımen ötkeli otırğan eske alu şaraları Qıtaydan jäne Moñğoliyadan kelgen belsendi qazaq azamattarınıñ küşimen atqarılmaq.
«Batır babamız Baytaylaq qazaq halqınıñ Joñğar şapqınşılığına qarsı wlt azattıq küreste erekşe erlik körsetip, atı añızğa aynalğan esimi twtas bir rulı eldiñ wranı bolğan aytulı twlğa. Şeruşi ruı negizinen Qıtay men Moñğoliya jerin mekendep qalğandıqtan Baytaylaq batır turalı tarihi mälimetter Qazaqstanda köp taralmağan. Ädette onıñ erligi Qabanbay, Bögenbay, Jänibek, Naurızbay sekildi batırlarmen birge ataladı. Babamızdıñ erligin QR Bilim jäne ğılım ministrligi ğılım komitetine qarastı Ş.Uälihanov atındağı tarih jäne etnologiya institutı resmi tanıp otır. Er Jänibek ömirden öter şağında özin ağasınıñ qasına jerleudi amanat etken eken. Baytaylaq pen er Jänibek ağalı-bauırlı ğana emes, twlpar minip, tu wstağan üzeñgiles batır, eli, jeri üşin qan maydanda erligimen tanılğan dara twlğalar bolğan. Büginde Qalba tauınıñ baurayında Baytaylaq qorımı dep atalatın jer atauı da saqtalğan. Sol üşin de Qazaq handığınıñ 550 jıldığı qarsañında batır babamızdı wlıqtau maqsatında naqtı şaralar ötkizu josparlap otırmız. Jekelegen belsendi azamattardıñ wyımdastırumen ötetin eske alu şaralarınıñ naqtı bağdarlaması negizinen dayın. Batırdıñ ziratına keseneni Dildähan Dälel esimdi azamat öz qarajatımen ornatqalı otır»,-deydi wyımdastıruşılar tobındağı Amantay Älhanwlı.

baq.kz