Zertteu kitabında qazaqtardıñ Europa elderine qonıstanu tarihı, sondağı qazaq diasporasınıñ qalıptasu kezeñderi jäne bügingi twrmıs tirşilikteri, kezdesip otırğan keybir ruhani-äleumettik qiındıqtar jaylı söz boladı. Kitap qalamger Dosan Baymoldanıñ «Azattıq» radiosında qızmet istegen jıldarındağı jinağan mwrağat qwjattarı jäne Europada twrıp jatqan qazaqtar arasında ötkizilgen saualnama, köptegen swhbat materialdarı negizinde jarıq körip otır.
«Bwl kitap Dosannıñ sonau 1980-2000 jıldarı Europanıñ Pol'şa, Çehiya sekildi elderde joğarı bilim alıp, ğılımmen jäne jurnalistik qızmettermen aynalısqan kezinde Europa qazaqtarı ömir sürip jatqan qalalarğa ädeyi barıp, jürgizgen swhbattarı men jinaqtağan mol materialdarı negizinde jazıldı. Äsirese, avtordıñ 1996-2002 jıldarı Pragada ornalasqan «Azattıq» radiosında qızmet etip, sondağı qazaq redakciyasınıñ «Şeteldegi qazaqtar» bağdarlamasın jürgizgen kezeñderi ayrıqşa jemisti boldı. Europada ömiriniñ 20 jılın ötkizgen zertteuşi ğalım Dosan Baymoldanıñ «Europa qazaqtarı» kitabı o basta Altaydan auğan el ömiriniñ jaña kezeñin, käri qwrılıqqa qonıstanu jağdayın jan-jaqtı zerttep körsetuge arnalğan alğaşqı eñbekterdiñ biri»,-deydi kitapqa alğısöz jazğan Düniejüzi qazaqtarı qauımdastığı törağasınıñ birinşi orınbasarı Talğat Mamaşev.
AQŞ, Wlıbritaniya, Pol'şa, Çehiya, Majarstan, Germaniya, Avstriya, Franciya, Şveciya, Niderlandiya, Şveycariya, Türkiya, Resey, Qırğızstan, Özbekstan, Iran jäne Qıtay siyaqtı elderde ğılımi jäne jurnalistik saparda bolğan tilşi qazaq, moñğol, polyak, çeh, ağılşın jäne orıs tilderin jetik meñgergen. Ğalımnıñ büginge deyin 12 kitabı baspa betin kördi.
Ayta keteyik, bwğan deyin Düniejüzi qazaqtarı qauımdastığınıñ «Atajwrt» baspa ortalığınan «Şeteldegi qazaqtar» seriyasımen «Moñğoliyadağı qazaqtar», «Qıtaydağı qazaqtar», «Özbekstandağı qazaqtar», «Irandağı qazaqtar» attı kitaptar jarıq körgen bolatın. Qazaq handığınıñ 550 jıldığı qarsañında şıqqan «Europa qazaqtarı» kitabı da sol eñbekterdiñ jalğası.

baq.kz