– Jaña zañdardı äzirleu men qabıldaudıñ barlıq mäseleleri jöninde Ükimetpen tığız äri üylesimdi özara is-qimıl jürgizu qajet. Osı orayda, zañdar tiyanaqtı äri sapalı äzirlengen boluı tiis. Äsirese Senat pen Mäjilis deputattarınıñ halıqqa jaña zañnamanıñ maqsattarı men mindetterin jetkilikti türde tüsindirudegi rölin arttıru mañızdı, – dedi Nwrswltan Nazarbaev.

Qazaqstan Prezidenti älemdik ekonomika men sayasattağı kürdeli jağdayğa nazar audardı.

– Älemdegi köptegen ekonomikası damığan jäne damuşı memleketter qiındıqtı bastan keşude. Elder arasındağı investiciya ağınınıñ kölemi azaydı. Biz älemdik ekonomikanıñ böligi bolğandıqtan, mwnıñ bäri Qazaqstandağı jağdayğa da keri äserin tigizude. Osınday jağdayda Ükimet pen Wlttıq banktiñ dağdarısqa qarsı is-qimıl josparınıñ iske asırıluı jalğasa beredi, ol jaña şaralarmen uaqtılı tolıqtırılıp otıradı,  – dedi Nwrswltan Nazarbaev.

Memleket basşısı deputattıq korpustı alda auqımdı jwmıs kütip twrğanın ayttı.

– Jaña sessiyanıñ ayasında Sizderge 50 şaqtı zañ jobasın talqılap, qabıldau qajet. 7 jaña zañdı qabıldauğa deputattar bastamaşılıq etti jäne onı Ükimet qoldadı. Bwl bastamalar – deputattıq korpustıñ joğarı käsibiliginiñ ayqın däleli. Ötken sessiya ayasındağı 28 joba boyınşa talqılau üderisi bastaldı, – dedi Qazaqstan Prezidenti.

Bwdan bölek, Nwrswltan Nazarbaev Parlament Palataları qızmetiniñ barınşa jariyalı boluı qajettigine toqtaldı.

– Zañdardı qabıldaudıñ qajettigi men bükil qisını qazaqstandıqtarğa ayqın äri tüsinikti bolğanı mañızdı. Küzgi sessiyadan bastap Senat pen Mäjilis jwmısınıñ, sonday-aq Parlament Palatalarınıñ birlesken otırıstarınıñ tikeley onlayn-körsetilimin engizu bwğan septigin tigizetin boladı. Sonımen qatar, zañ şığaru üderisiniñ ayasın keñeytu qajet. Jobalardı äzirleu kezeñinde oğan qoğamdıq sarapşılar, parlamenttik emes partiyalar men ükimettik emes wyımdar jäne BAQ ökilderin tartu kerek. Halıqtı aldın-ala aqparattandıru jäne tiisti  qwqıqtıq jañalıq-özgeristerdi qoğamdıq talqılau jönindegi EIDW elderiniñ täjiribesin belsene qoldanu kerek, – dedi Elbası.

Söziniñ soñında Nwrswltan Nazarbaev jinalğandardı kezekti parlamenttik sessiyanıñ bastaluımen qwttıqtap, zor densaulıq jäne jemisti jwmıs tiledi.