Elbası Özbekstan halqına qattı qayğırıp köñil ayttı.
kerey.kz
Elbası Nwrswltan Nazarbaev Özbekstan Respublikasınıñ Prezidenti Islam Karimovtiñ qaytıs boluına baylanıstı Özbekstan Respublikası Oliy Mäjilisi Senatınıñ törağası Nigmatilla YUldaşevke köñil aytu jedelhatın joldadı-dep habarladı Aqorda baspa söz qızmeti.Memleket basşısı Özbekstan Respublikasınıñ Prezidenti Islam Abduganieviç Karimovtiñ dünieden ötkeni turalı habardı zor küyzelispen qabıldağanın aytqan.
«Qazaqstandıqtar bwl mezgilsiz äri ornı tolmas qazanıñ auırtpalığın bauırlas Özbekstan halqımen birge bölisedi. 30 jılday qanattasa jwmıs istegen dosımnan ayrılğanıma qayğıramın», – delingen köñil aytu jedelhatında.
Sonday-aq, Nwrswltan Nazarbaev eldiñ ekonomikalıq äleuetiniñ damuına, onıñ halıqaralıq bedeliniñ ösuine, qoğamnıñ äl-auqatınıñ artuına ıqpal etken auqımdı özgeristerdiñ jüzege asırıluı Özbekstan Respublikası täuelsizdiginiñ bastauında twrğan Islam Karimovtiñ esimimen baylanıstı ekenin atap ötti.
«Ol öziniñ bükil ömirin tuğan halqına qaltqısız qızmet etuge arnadı, ärdayım Qazaqstannıñ senimdi dosı boldı jäne bizdiñ halıqtarımızdıñ arasında dostıq pen tatu körşiliktiñ nığaya tüsuine ülken üles qostı», – delingen jedelhatta.
Soñında Qazaqstan Prezidenti Islam Abduganieviç Karimovtiñ tuıstarı men jaqındarına jäne eldiñ basşılığı men bauırlas Özbekstan halqına qattı qayğırıp köñil ayttı.
Pikir qaldıru