Almatıda bügin prezident mwrağatında “Jasampazdıq pen tabıstıñ qazaqstandıq jolı” dep atalatın körme aşıldı dep habarlaydı Azattıq tilşisi. Körmege birinşi ret Qazaqstannıñ memleket bolıp qalıptasu tarihına qatıstı normativtik jäne zañnamalıq qwjattardıñ, strategiyalıq josparlardıñ tüpnwsqaları, prezident Nwrswltan Nazarbaevtıñ ondağan sureti men kitabı qoyılğan.

Körmeniñ eki stendi Qazaqstan men AQŞ-tıñ diplomatiyalıq ıntımaqtastığına 25 jıl tolğanına arnalğan. AQŞ Qazaqstannıñ täuelsizdigin alğaş bolıp moyındağan. Körmege qoyılğan hattar arasında AQŞ prezidenti ülken Djordj Buştıñ Qazaqstan täuelsizdigin resmi türde moyındau turalı hatınıñ köşirmesi bar. Hat 1991 jılı 26 jeltoqsanda jazılğan. Körme aşılğannan keyin birden ötkizilgen döñgelek üstelde AQŞ-tıñ bas konsulı Mark Mudi mwrağat direktorı Boris Japarovqa osı hattıñ köşirmesin tabıstadı.

AQŞ diplomatı qwttıqtau sözinde eki jaqtı qarım-qatınastıñ negizgi damu kezeñderin aytıp ötti. Ol söziniñ arasında ekranda Nazarbaevtıñ 1992 jılı 19 mamırda alğaş ret Aq üyge jasağan alğaşqı saparınan, Buş pen Nazarbaevtıñ amerikalıq “Tağa” oyının oynağanınan, Nazarbaevtıñ Qazaqstanda jwmıs istegen AQŞ elşilerimen tüsken suretterin körsetti.

Körmeniñ aşıluı men döñgelek üstelge memleket jäne qoğam qayratkerleri, şetel diplomattarı, memlekettik mekemelerdiñ, wlttıq-mädeni ortalıqtardıñ ökilderi, ğılımi jäne intelligenciya ökilderi, Almatıdağı oqu orındarınıñ oqıtuşıları men studentteri qatıstı. Körmeni wyımdastırğandar körme men döñgelek üsteldiñ “Qazaqstannıñ täuelsizdik jıldarı jetken jetistikterin” keñinen qamtıp, nasihattau üşin wyımdastırılğanın aytadı.

Azat Europa / Azattıq radiosı