Қазақстан Республикасының барлық құқық қорғау ұйымдарының назарына!

Құрметті ІІМ, Бас прокурор, ҰҚК төрағасы: Алматы қаласында жария және құпия түрде жұмыс істеп жүрген сепаратистік ұйым бар. Бұлар аракідік өз жұмыстарын істеп, кейде тынышталып жатып қалады. Аталмыш топтың әрекеттеріне назар аударып, ұлттық қауіпсіздігімізге нұқсан келтірушілер ретінде тиісті шара қолданарсыздар. Осы топтың қаржыландыруы, жұмыс барысына және көмек беруші ақпарат құралдарына назар аудару керек деп есептеймін.

Атқарушы билік тиісті заң шығарып, өзіміздің байрағымыз түстес мерекелік ленталарды қолдануға үгіттегенімен, бұл топ «георгий лентасын» ашық түрде таратып әлек.

Мысалы, «SMALL» супермаркеті ұлттық нақыштағы ленталарды елемей, аталмыш лентамен безендіріліп қойған. Сұрастырып көрсек, бұл әрекет дүкеннің басшылығының тікелей нұсқауымен болған екен.

Сондай-ақ 132-мектептің бастауыш сыныптағы оқушылары да бұл лентаны тағып алып, емін еркін жүр. Бұл бассыздыққа кім жауап берер екен?!

Алматы қаласының № 105-маршруты. Жүргізушінің айтуы бойынша түнде белгісіз біреулер «георгий лентасын» барлық көліктерге іліп тастаған көрінеді. Көкірегі ояу азаматтар ертесімен шешіп тастап, жұмысқа шығыпты. Бірақ, бұл кімнің ісі екені сол күйінде белгісіз болып қалды.

«Алтын орда» базарының жанындағы «SMALL» супермаркетінде зымиян саясатты уағыздайтын лентаның ілулі тұрғанын көргеннен кейін, мен дереу түрде полиция қызметкерлерін шақырдым. Келген қызметкерлер дүкеннің ішіне кіруге, заң бұзылғанын анықтауға бас тартты. Тек менен арыз жаздырып алып кете берді. Тіпті, түрі азиаттыққа келетін аға сержант менің қазақ тілінде сөйлеп тұрғанымды жақтырмай, тыңдамай қойды (өзінің кім екенін дұрыс таныстырмады, тек «Кудинов» дегенін естіп қалдым). Айтуынша, тілді білмейді екен.

Мемлекеттік қазақ тілін меңгермеген адам қалайша құқық қорғау саласында жұмыс істеп жүр? Полиция қызметкері дегеніміз биліктің халық алдындағы өкілі емес пе?

Сондықтан министрлер, бас прокурор, және де басқа да құзырлы билік басындағы тұлғалар, елімізде болып жатқан бұл заңсыз әрекеттерді өз уақытында тыйып, мемлекетіміздің қауіпсіздігіне нұқсан келмеуін қадалағаңыздар! Бұл халықтың тілегі.

Құрметпен Әзімбай Ғали