Ал бұл жолғы жаңалық… Шын мәнiнде, Дәуiт пайғамбардың шамдалының жарығы түскендей сәуле­лi, жағымды жаңалық. Ендi осы жаңалықпен танысалық. 25 жастағы Асхат Мырзабаев Англияда “Barclays” атты банктер жүйесiнде жұмыс iстеп жүрiп, 2 миллион доллар табыс тауыпты. Жақында Асхат осы 2 миллион долларды қа­терлi iсiктi (рак) зерттейтiн халық­аралық ғылыми орталыққа аудар­ған. Бұл жөнiнде Асхаттың өзi не дей­дi? Құлақ түрелiк:

– Онкологиялық ауруханаларды көбейткеннен ештеңе өнбейдi, одан да қатерлi iсiк қалай, қайдан, неден пайда болады, осы мәселеге терең ден қоюымыз керек. Сол үшiн мен де өзiмнiң 2 миллион долларымды қатерлi iсiктi зерттеп жүрген ғылыми орталыққа аудардым. Ғалымдарға көмек болсын деп… Менiң басты мақсатым – ақша емес. Iскер адамға ақша табу қиын емес. Ең басты мәселе – сол ақшаны қайда жұмсай бiлуде. Менiң өз ойымша, ақша тек пайдалы, игiлiктi iске жұмсалуға тиiс. Адамзатқа пайдасы тиетiн тiрлiкке жұмсалмаған ақша – ақша емес…

25 жас. Асхаттың да нағыз қызық қуатын, қыз қуатын, қыдыратын (түнгi клуб, яхта, түрлi сейiл-серуен), қымбат автокөлiкке мiнiп, қымбат пәтерлер жалдап, ақшаны оңды-солды шашатын, осылайша “айхай, 25-тi” армансыз өткiзетiн кезi емес пе?! Жоқ, Асхат, Қазақстандағы қызға да, қызыққа да, қызметке де тоймайтын, ақшаға да тоймайтын, басқаға да тоймайтын ағалары секiлдi емес, басқа жолды таңдап отыр. Иманды, игiлiктi, қа­йырлы жолды.

Бәлкiм, бұл бiздiң тазара бастауымыздың басы шығар? Бәлкiм, бұл бiздiң адамдық болмысымыз­ға, адамгершiлiкке қайта оралуымыздың бiр белгiсi болар? Не десек те, қайырлы болсын!

Асхат Мырзабаев өзiнiң блогер Бота Жұмановаға берген сұхбатында тағы да бүй дейдi:

– Қазақстанда талантты қазақ жiгiттерi (“хайперлер”) аз емес. Осылардың Еуропаның ең үздiк компанияларына жұмысқа орналасуына қол ұшымды берсем деймiн.

Қандай жақсы ниет! Ниетiңе жет, Асхат!

zhasalash.kz