سيريا جانجالىن رەتتەۋ بويىنشا تەحنيكالىق كەزدەسۋگە قاتىسۋشىلار بۇگىن استانادا الدىن الا كەڭەسۋلەر وتكىزىپ جاتىر دەپ حابارلادى ينتەرفاكس-قازاقستان اگەنتتىگى. ەرتەڭ استانادا سيريا بويىنشا بىرلەسكەن جەدەل توپتىڭ وتىرىسىن وتكىزۋ جوسپارلانعان. يران، رەسەي جانە تۇركيا دەلەگاتسيالارى مەن بۇۇ وكىلى وتكەن جىلعى جەلتوقساننىڭ 29-ى كۇنى جاسالعان كەلىسىمگە سايكەس ورناعان بەيبىتشىلىك ءتارتىبىن باقىلاۋعا قاتىستى ماسەلەلەردى تالقىلاۋعا جينالماق.

بۇعان دەيىن قاڭتاردىڭ 23-24 كۇندەرى استانادا وتكەن كەلىسسوزدەر قورىتىندىسى بويىنشا يران، رەسەي جانە تۇركيا رەسمي وكىلدەرى سيرياداعى اتىستى توقتاتۋ ءتارتىبىن قاداعالاۋدىڭ مەحانيزمىن قۇرۋ تۋرالى كەلىسكەن. بىراق ولار سيريادا التى جىل بويى جالعاسىپ كەلە جاتقان ازامات سوعىسىن ساياسي رەتتەۋ باعىتىندا ناتيجەگە قول جەتكىزە الماعان ەدى. ماسكەۋ مەن تەگەران پرەزيدەنت باشار اساد ۇكىمەتىنە، ال انكارا اساد بيلىگىنە قارسى كۇرەسىپ جاتقان وپپوزيتسيا كۇشتەرىنىڭ ءبىر بولىگىنە قولداۋ بىلدىرەدى. استانادا قاڭتاردا وتكەن سيريا ۇكىمەتى وكىلدەرىمەن جاناما كەلىسسوزدەرگە قاتىسقان سيريا وپپوزيتسياسى سول جولى كەزدەسۋگە قاتىسۋشىلاردىڭ قورىتىندى مالىمدەمەسى كوڭىلدەرىنەن شىقپايتىنىن ايتقان.

جەنەۆاداعى سيريا بويىنشا بەيبىت كەلىسسوزدەردىڭ جاڭا كەزەڭى كەزەكتى رەت كەيىنگە قالدى. اقپاننىڭ 1-ءى كۇنى بۇۇ-نىڭ سيريا بويىنشا ارنايى وكىلى ستاففان دە ميستۋرا كەلىسسوزدەردىڭ ەكى اپتاعا كەيىنگە شەگەرىلگەنى تۋرالى حابارلاپ، بۇل ۋاقىت سيريا ۇكىمەتىنە قويىلعان كەيبىر شارتتارعا قاتىستى ويلانىپ-تولعانۋعا، ال وپپوزيتسياعا بىرلەسكەن دەلەگاتسيا قۇرۋعا مۇمكىندىك بەرەدى دەپ سانايتىنىن ايتقان.

سيريا جانجالىن رەتتەۋ بويىنشا جەنەۆاداعى كەلىسسوزدەر بۇنىڭ الدىندا 2016 جىلعى ساۋىردە وتكەن.                                                                     ازات ەۋروپا / ازاتتىق راديوسى