Siriya janjalın retteu boyınşa tehnikalıq kezdesuge qatısuşılar bügin Astanada aldın ala keñesuler ötkizip jatır dep habarladı Interfaks-Qazaqstan agenttigi. Erteñ Astanada Siriya boyınşa birlesken jedel toptıñ otırısın ötkizu josparlanğan. Iran, Resey jäne Türkiya delegaciyaları men BWW ökili ötken jılğı jeltoqsannıñ 29-ı küni jasalğan kelisimge säykes ornağan beybitşilik tärtibin baqılauğa qatıstı mäselelerdi talqılauğa jinalmaq.

Bwğan deyin qañtardıñ 23-24 künderi Astanada ötken kelissözder qorıtındısı boyınşa Iran, Resey jäne Türkiya resmi ökilderi Siriyadağı atıstı toqtatu tärtibin qadağalaudıñ mehanizmin qwru turalı kelisken. Biraq olar Siriyada altı jıl boyı jalğasıp kele jatqan azamat soğısın sayasi retteu bağıtında nätijege qol jetkize almağan edi. Mäskeu men Tegeran prezident Başar Asad ükimetine, al Ankara Asad biligine qarsı küresip jatqan oppoziciya küşteriniñ bir böligine qoldau bildiredi. Astanada qañtarda ötken Siriya ükimeti ökilderimen janama kelissözderge qatısqan Siriya oppoziciyası sol jolı kezdesuge qatısuşılardıñ qorıtındı mälimdemesi köñilderinen şıqpaytının aytqan.

Jenevadağı Siriya boyınşa beybit kelissözderdiñ jaña kezeñi kezekti ret keyinge qaldı. Aqpannıñ 1-i küni BWW-nıñ Siriya boyınşa arnayı ökili Staffan de Mistura kelissözderdiñ eki aptağa keyinge şegerilgeni turalı habarlap, bwl uaqıt Siriya ükimetine qoyılğan keybir şarttarğa qatıstı oylanıp-tolğanuğa, al oppoziciyağa birlesken delegaciya qwruğa mümkindik beredi dep sanaytının aytqan.

Siriya janjalın retteu boyınşa Jenevadağı kelissözder bwnıñ aldında 2016 jılğı säuirde ötken.                                                                     Azat Europa / Azattıq radiosı