ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ توراعاسى ماۋلەن اشىمباەۆ رەسەي پارلامەنتىنىڭ دەپۋتاتتارى قازاقستاننىڭ تاۋەلسىزدىگى جانە تەرريتوريالىق تۇتاستىعى ماسەلەلەرىنە قاتىستى پىكىر بىلدىرگەندە اباي بولۋى تيىستىگىن مالىمدەدى دەپ حابارلادى جەرگىلىكتى اگەنتتىكتەر. اشىمباەۆ مۇنى رەسەي مەملەكەتتىك دۋماسىنىڭ دەپۋتاتى پاۆەل شپەروۆتىڭ قاڭتاردىڭ 26-سى پارلامەنتتىك دوڭگەلەك ۇستەل وتىرىسىندا جاساعان مالىمدەمەسىنە بايلانىستى ايتتى. شپەروۆ ول وتىرىستا رەسەيدىڭ “ۇلى ەل” ەكەنىن ايتىپ، “دۇنيەجۇزىندەگى ءوز مۇددەمىزدى قورعاۋىمىز قاجەت” دەگەن. ول “تاياۋ شەتەل دەپ جۇرگەن ەلدەردە ازىرگە مۇنداي مۇمكىندىك بار. قازاقستانداعى ورىس وتانداستىرىمىزدى دياسپورا دەۋ قاتە، ويتكەنى ولار وتىرعان جەر – ۋاقىتشا شەتەل يەلەنگەن ءبىزدىڭ جەرىمىز. ماڭگىلىك شەكارا جوق، ءبىز ءالى رەسەي شەكاراسىنا قايتا ورالامىز جانە ول تاياۋ ۋاقىتتا جۇزەگە اسادى” دەگەن ەدى.

“شپەروۆتىڭ قازاقستان تەرريتورياسىنا قاتىستى ايتقان پىكىرىن ءجونسىز دەپ سانايمىن. مۇنداي پىكىر قازاقستان مەن رەسەيدىڭ ستراتەگيالىق ارىپتەستىك جانە وداقتاستىق ۇستانىمدارىنا نەگىزدەلگەن دوستىق جانە تاتۋ كورشىلىك قارىم-قاتىناس اۋانىنا ساي ەمەس” دەگەن اشىمباەۆ.

ماۋلەن اشىمباەۆتىڭ سوزىنشە، قازاقستاننىڭ تەرريتوريالىق تۇتاستىعى مەن تاۋەلسىزدىگى مىزعىمايدى جانە ونىڭ شەكاراسى حالىقارالىق كەلىسىمدەر ارقىلى انىقتالىپ، بەلگىلەنگەن. كوميتەت توراعاسى قازاقستان-رەسەي قارىم-قاتىناسى 21-عاسىرداعى تاتۋ كورشىلىك جانە وداقتاستىق تۋرالى كەلىسىم مەن قازاقستان-رەسەي مەملەكەتتىك شەكاراسى تۋرالى كەلىسىمگە نەگىزدەلگەنىن ايتادى.

3 اقپاندا رەسەي سىرتقى ىستەر مينيسترلىگى شپەروۆتىڭ سوزىنەن سوڭ ينتەرنەتتە ەكى ەل بايلانىسىنىڭ تالقىعا تۇسۋىنە بايلانىستى ماسكەۋدىڭ قازاقستانمەن قارىم-قاتىناسى بويىنشا سىرتقى ساياساتى ماسەلەلەرىندەگى رەسمي ۇستانىمىن رەسەي پرەزيدەنتى، پرەمەر-ءمينيسترى، سىرتقى ىستەر ءمينيسترى جانە ۋاكىلەتتى تۇلعا عانا بىلدىرە الادى دەپ مالىمدەگەن.                                                                                              ازات ەۋروپا / ازاتتىق راديوسى