Mäjilistiñ halıqaralıq ister, qorğanıs jäne qauipsizdik komitetiniñ törağası Mäulen Äşimbaev Resey parlamentiniñ deputattarı Qazaqstannıñ täuelsizdigi jäne territoriyalıq twtastığı mäselelerine qatıstı pikir bildirgende abay boluı tiistigin mälimdedi dep habarladı jergilikti agenttikter. Äşimbaev mwnı Resey memlekettik dumasınıñ deputatı Pavel Şperovtiñ qañtardıñ 26-sı parlamenttik döñgelek üstel otırısında jasağan mälimdemesine baylanıstı ayttı. Şperov ol otırısta Reseydiñ “wlı el” ekenin aytıp, “Düniejüzindegi öz müddemizdi qorğauımız qajet” degen. Ol “Tayau şetel dep jürgen elderde äzirge mwnday mümkindik bar. Qazaqstandağı orıs otandastırımızdı diaspora deu qate, öytkeni olar otırğan jer – uaqıtşa şetel ielengen bizdiñ jerimiz. Mäñgilik şekara joq, biz äli Resey şekarasına qayta oralamız jäne ol tayau uaqıtta jüzege asadı” degen edi.

“Şperovtiñ Qazaqstan territoriyasına qatıstı aytqan pikirin jönsiz dep sanaymın. Mwnday pikir Qazaqstan men Reseydiñ strategiyalıq äriptestik jäne odaqtastıq wstanımdarına negizdelgen dostıq jäne tatu körşilik qarım-qatınas auanına say emes” degen Äşimbaev.

Mäulen Äşimbaevtiñ sözinşe, Qazaqstannıñ territoriyalıq twtastığı men täuelsizdigi mızğımaydı jäne onıñ şekarası halıqaralıq kelisimder arqılı anıqtalıp, belgilengen. Komitet törağası Qazaqstan-Resey qarım-qatınası 21-ğasırdağı tatu körşilik jäne odaqtastıq turalı kelisim men Qazaqstan-Resey memlekettik şekarası turalı kelisimge negizdelgenin aytadı.

3 aqpanda Resey sırtqı ister ministrligi Şperovtiñ sözinen soñ internette eki el baylanısınıñ talqığa tüsuine baylanıstı Mäskeudiñ Qazaqstanmen qarım-qatınası boyınşa sırtqı sayasatı mäselelerindegi resmi wstanımın Resey prezidenti, prem'er-ministri, sırtqı ister ministri jäne uäkiletti twlğa ğana bildire aladı dep mälimdegen.                                                                                              Azat Europa / Azattıq radiosı