21 جاستاعى ءداستۇر تۇرسىنجان الماتىداعى ۋنيۆەرسيادادا كونكيمەن 5000 مەترگە جۇگىرۋدەن 7 مينۋت 27 سەكۋند ۋاقىت كورسەتىپ، 17-ورىن الدى. ال كوماندالىق ەسەپتە قىتاي قۇراماسى 4-ورىن يەلەندى. سپورتشى مەدەۋ مۇز ايدىنىندا كورسەتكەن ناتيجەسىنە كوڭىلى تولمايدى.

- قىتايدىڭ ىشكى جارىستارىندا 5000 مەتردى جاقسى جۇگىرگەم (6 مينۋت 52 سەكۋند). الماتىعا سول ناتيجەنى كورسەتەمىن دەپ كەلگەنمىن. ەگەر ءوز ناتيجەمدى كورسەتكەندە ۇشتىككە ەنەر ەدىم. بىراق بۇل جارىسقا بابىم دۇرىس بولماي قالعان سياقتى، – دەيدى سپورتشى.

قىتايداعى جەتىستىكتەرى

قىتايداعى جارىستاردىڭ بىرىندە جۇرگەن ءداستۇر تۇرسىنجان (سۋرەت سپورتشىنىڭ جەكە ارحيۆىنەن الىندى).

21 جاستاعى كونكيشى ۇزاق قاشىقتىقتارعا جۇگىرۋگە ماشىقتانعانىن ايتادى. بيىل قاڭتاردىڭ 19-ى مەن 20-سى حاربيندە وتكەن قىتاي چەمپيوناتىندا كونكي كوپسايىسىنىڭ قولا مەدالىن العان. ال 2016 جىلى جەلتوقساندا حاربيندەگى قىتاي كۋبوگىنىڭ ەكىنشى كەزەڭىندە 5000 مەترگە جۇگىرۋدە – التىن، 1500 مەترگە جۇگىرۋدە كۇمىس جۇلدە يەلەنگەن. وسى جەتىستىگىنەن كەيىن ول قىتاي جاستار قۇراماسىنا ەنىپ، الماتىداعى ۋنيۆەرسياداعا جولداما يەلەنگەن.

- كۋبوك – قىتايداعى ەكىنشى دەڭگەيلى جارىس. كوبىنە جاس سپورتشىلار قاتىسادى. قىتاي كۋبوگىندا جەڭىسكە جەتكەن سوڭ جاستار قۇراماسىنا شاقىردى. ال بيىل العاش رەت قىتاي چەمپيوناتىندا مەدال الدىم، – دەيدى ول.

ءداستۇر كونكي سپورتىمەن بالا كەزىنەن اينالىساتىنىن ايتادى. قىتايداعى ىشكى جارىستارعا 2010 جىلدان بەرى قاتىسقان. جاسوسسپىرىمدەر اراسىنداعى قىتاي چەمپيوناتىنىڭ قولا جۇلدەگەرى.

- كونكي جارىستارىن تەلەديداردان كوپ كورسەتەتىن. سودان قىزىعا باستادىم. وقۋشى كەزدەن اينالىسىپ ءجۇرمىن. نەگىزىنەن ۇرىمشىدە جاتتىعامىن. ناتيجە بىردەن بولمايدى. اقىرىنداپ بارلىعى كەلە جاتىر. كەلەر جىلى قىتاي قۇراماسىنا ەنىپ، الەم كۋبوگى مەن الەم چەمپيوناتىنا، وليمپياداعا قاتىسقىم كەلەدى، – دەيدى كونكيشى.

ءداستۇر تۇرسىنجان 2016 جىلى ۇرىمشىدە وتكەن قىتاي قىسقى ويىندارىنا شىڭجاڭ قۇراماسى ساپىندا قاتىسىپ، 1500 مەترلىك جارىستان 7-ورىن العانىن ايتادى.

ءداستۇر تۇرسىنجان مۇز ايدىنىندا جاتتىعىپ ءجۇر. الماتى، ۋنيۆەرسيادا، 5 اقپان 2017 جىل.

- قىتايدىڭ قىسقى ويىندارى – ەلدەگى وتە بەدەلدى جارىس. وليمپيادا سياقتى ءتورت جىلدا ءبىر رەت وتەدى. وعان قاتىسۋ – كەز كەلگەن سپورتشىنىڭ ارمانى. 2016 جىلى ۇرىمشىدەگى ويىندارعا قاتىستىم. 2022 جىلى بەيجىڭدە وتەتىن قىسقى وليمپياداعا دا قاتىسقىم كەلەدى، – دەيدى كونكيشى.

ءداستۇردىڭ اتا-اناسى شىڭجاڭدا تۇرادى. ءوزى ءۇرىمشى قالاسىنداعى شىڭجاڭ سپورت كوللەدجىندە جاتتىقتىرۋشى ماماندىعى بويىنشا وقىپ ءجۇر. كونكيشى الماتىداعى جارىستان سوڭ ۇرىمشىگە ورالىپ، دايىندىعىن جالعاستىرماق. الداعى ۋاقىتتا ول قىتاي كۋبوگىنىڭ كەزەڭدەرىنە قاتىسادى.

بۇل – ءداستۇردىڭ قازاقستانعا العاش كەلۋى. كەلەشەكتە اتا-اناسىن الىپ كەلىپ، تاريحي وتانىن كورسەتكىسى كەلەدى.

رۋسلان مەدەلبەك

ازات ەۋروپا / ازاتتىق راديوسى