وتىرىستى اشقان نۇرسۇلتان نازارباەۆ اسكەري جاتتىعۋ بارىسىندا قازا تاپقان 7 اسكەري قىزمەتكەردىڭ تۋىستارى مەن جاقىندارىنا بارشا قازاقستان حالقىنىڭ جانە جەكە ءوزىنىڭ اتىنان كوڭىل ايتتى.

– جامبىل وبلىسىندا قار كوشكىنى سالدارىنان بولعان قايعىلى وقيعا تۋرالى حاباردى زور كۇيزەلىسپەن قابىلدادىم. ولاردىڭ ارقايسىسى ەلىنىڭ ناعىز پاتريوتى بولىپ، ءوز اسكەري مىندەتىن سوڭىنا دەيىن اتقاردى. قورعانىس مينيسترلىگىنە قازا تاپقان ساربازداردىڭ وتباسىلارىنىڭ بارىنە جان-جاقتى كومەك پەن قولداۋ كورسەتۋدى تاپسىرامىن. مەملەكەتتىك كوميسسيا بولعان وقيعانىڭ سەبەپتەرىن انىقتاۋدا. مۇنداي قايعىلى جاعداي بولاشاقتا قايتالانباۋ ءۇشىن بارلىق قاجەتتى شارالاردى قابىلدايمىز، – دەدى قازاقستان پرەزيدەنتى.

قاۋىپسىزدىك كەڭەسىنىڭ كۇن تارتىبىنە مىناداي ماسەلەلەر شىعارىلدى:

– قازاقستان رەسپۋبليكاسى ۇلتتىق قاۋىپسىزدىگىنىڭ 2012-2016 جىلدارعا ارنالعان ستراتەگياسىنىڭ ىسكە اسىرىلۋ قورىتىندىلارى، جاڭا ستراتەگيادا بەلگىلەنگەن الداعى كەزەڭگە ارنالعان نەگىزگى قادامداردىڭ تانىستىرىلىمى;

– اسكەري-تەحنيكالىق ساياساتتىڭ بىرقاتار اسپەكتىسى;

– «ەكسپو-2017» حالىقارالىق كورمەسىنە دايىندىق جانە ونى وتكىزۋ كەزىندە قوعامدىق قاۋىپسىزدىكتى قامتاماسىز ەتۋ شارالارى.

ەلباسى قۇزىرەتتى مەملەكەتتىك ورگانداردىڭ كۇش-جىگەرى ارقاسىندا وتكەن كەزەڭدە قازاقستاندا سىرتقى قاۋىپسىزدىك پەن ىشكى ساياسي تۇراقتىلىق قامتاماسىز ەتىلگەنىن اتاپ ءوتتى.

– الەمدىك ەكونوميكاداعى داعدارىس جاعدايىنا، وتاندىق ەكونوميكانىڭ قيىنشىلىقتارىنا قاراماستان، ماكروەكونوميكالىق كورسەتكىشتەردى ءتيىمدى دەڭگەيدە ۇستاپ تۇرا الدىق. ىشكى، وڭىرلىك جانە جاھاندىق ۇدەرىستەرگە قاتىستى جۇرگىزىلگەن تالداۋ الداعى كەزەڭدەگى ەلىمىزدىڭ ۇلتتىق قاۋىپسىزدىگىنە ءتونۋى ىقتيمال سىن-قاتەرلەر مەن قاۋىپتەردى انىقتاۋعا مۇمكىندىك بەردى. قازىر ەلىمىزدە قازاقستان حالقىنا جولداۋدا كورسەتىلگەن ماقساتتار مەن مىندەتتەر، ۇسىنىلعان ساياسي جانە كونستيتۋتسيالىق رەفورمالار تالقىلانۋدا. جالپى، ولاردىڭ دەنى رەسپۋبليكا تۇرعىندارىنىڭ قولداۋىنا يە بولىپ وتىر، – دەدى مەملەكەت باسشىسى.

سونداي-اق، قازاقستان پرەزيدەنتى قازىرگى كەزدە قاۋىپتىلىگى وزەكتى بولىپ وتىرعان ەكسترەميستىك جانە تەرروريستىك ارەكەتتەرگە قارسى تۇرۋ ەڭ اۋەلگى مىندەت بولىپ تابىلاتىنىن ايتتى.

– جاڭا ستراتەگيادا اتالعان قىزمەت باعىتتارىنىڭ ارقايسىسى بويىنشا ءتيىستى قۇرىلىمداردىڭ ارەكەت ەتۋ شارالارى قاراستىرىلعان، – دەپ تۇيىندەدى نۇرسۇلتان نازارباەۆ.

بۇدان بولەك، مەملەكەت باسشىسى مەملەكەتتىك ورگاندارعا باسقا دا سالالار مەن باعىتتارعا قاتىستى ۇلتتىق قاۋىپسىزدىكتى قامتاماسىز ەتۋ جونىندە بىرقاتار مىندەت قويدى.