قازاقستان مەن رەسەي پرەزيدەنتتەرى كەزدەسۋ بارىسىندا ەكىجاقتى ىنتىماقتاستىق ماسەلەلەرىن جانە كۇن تارتىبىندەگى باستى حالىقارالىق تاقىرىپتاردى تالقىلادى.

مەملەكەت باسشىسى قازاقستاننىڭ رەسەيمەن قارىم-قاتىناسىنىڭ ەرەكشەلىگىنە توقتالىپ، ەكى ەل اراسىنداعى سەنىم مەن تۇسىنىستىك دەڭگەيى جوعارى ەكەنىن اتاپ ءوتتى.

– بيىل ارامىزدا ديپلوماتيالىق قارىم-قاتىناستىڭ ورناعانىنا 25 جىل تولادى. تىعىز ىنتىماقتاستىق ارقاسىندا ءبىز ەۋرازيالىق ەكونوميكالىق وداقتى قۇردىق. بۇل ونىڭ بارلىق قاتىسۋشىلارى ءۇشىن ماڭىزدى ءارى پەرسپەكتيۆالى قۇرىلىم دەپ سانايمىن. بۇگىندە رەسەيدىڭ 7 مىڭنان استام كاسىپورنى قازاقستاندا وكىلدىكتەرىن اشىپ، جاڭادان قايتا وڭدەۋ ونەركاسىبىن قۇرۋعا ىقپال ەتۋدە. ءسىزدىڭ بىلتىر كۇزدە قازاقستانعا جاساعان ساپارىڭىز بەن ەۋرازيالىق ەكونوميكالىق وداق اياسىندا سانكت-پەتەربۋرگتەگى كەزدەسۋىمىز قۇنى 3 ميلليارد اقش دوللارىن قۇرايتىن 41 كەلىسىمشارتقا قول قويۋعا مۇمكىندىك بەردى، – دەدى قازاقستان پرەزيدەنتى.

نۇرسۇلتان نازارباەۆ كۇن تارتىبىندەگى حالىقارالىق ماسەلەلەرگە قاتىستى قازاقستان مەن رەسەيدىڭ ۇستانىمى بىردەي ەكەنىن جانە بۇۇ قاۋىپسىزدىك كەڭەسى اياسىندا ورتاق مىندەتتەردى ىسكە اسىرۋ ءۇشىن ەكى ەل دە بار كۇش-جىگەرىن جۇمسايتىنىن ايتتى.

– رەسەي حالىقارالىق وزەكتى ماسەلەلەردى شەشۋ، سونىڭ ىشىندە سيريا قاقتىعىسىن رەتتەۋ جونىندە شارالار قابىلداۋدا. استانادا بىرنەشە كەلىسسوز وتكىزۋ تۋرالى ۇسىنىس بىلدىرگەن دە رەسەي بولاتىن. ۇدەرىس باستالىپ كەتتى. جالپى وسى جانە باسقا دا ماسەلەلەردى شەشۋ ءۇشىن جىل بويى بىرقاتار كەزدەسۋ وتكىزۋ قاجەت، سونىڭ ءبىرى 8 ماۋسىمدا استانادا وتەتىن شانحاي ىنتىماقتاستىق ۇيىمى اياسىنداعى باسقوسۋ بولماق. قازىرگى بارلىق ماسەلەلەر دوستىق نەگىزىندە شەشىلۋدە. بىرلەسكەن كاسىپورىندار قۇرىپ، العا قاراي ىلگەرىلەيتىن بولامىز، – دەپ تۇيىندەدى مەملەكەت باسشىسى.

ۆ.پۋتين نۇرسۇلتان نازارباەۆقا سيرياداعى قاقتىعىستى رەتتەۋ جونىندەگى كەلىسسوزدەردى استانادا ۇيىمداستىرعانى ءۇشىن العىس ءبىلدىردى.

– بۇل ۇدەرىستە قازاقستان تاراپىنىڭ جاي ۇيىمداستىرۋشى رەتىندە عانا قاتىسىپ قويماي، جالپى جاعىمدى ءرول اتقارعانىن بىلەمىن. ءسىز كەزدەسۋ ۇيىمداستىرۋعا تىكەلەي اتسالىسىپ، قاتىسۋشىلارمەن جانە دەلەگاتتارمەن جۇمىس جۇرگىزدىڭىز. ءسىزدىڭ ارقاڭىزدا ەشقاشان بولماعان ناتيجەگە قول جەتكىزدىك. اسىرەسە، اتىستىڭ توقتاتىلۋىنا باقىلاۋ جاساۋ تەتىگى تابىلدى، بۇل – ەڭ باستى ماسەلە. ەندى بۇل جەنەۆادا جالعاساتىن كەلىسسوزدەرگە نەگىز بولادى، – دەدى رەسەي پرەزيدەنتى.

ۆ.پۋتين قازاقستاننىڭ رەسەيدىڭ باستى ەكونوميكالىق سەرىكتەسىنىڭ ءبىرى رەتىندەگى ماڭىزدىلىعىن اتاپ ءوتىپ، ينتەگراتسيالىق ۇدەرىستەر بارىسىندا جاسالعان جاعداي ارقىلى ناقتى كولەمدى ۇلعايتۋعا قول جەتكىزىپ، ىنتىماقتاستىقتى ۇدايى ارتتىرىپ وتىرۋ قاجەتتىگىن ايتتى.

رەسەي پرەزيدەنتى ءوز ەلىنىڭ جاھاندىق ماسەلەلەردى شەشۋدە قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى قولداۋىنان ءۇمىتتى ەكەنىن جەتكىزدى.

كەزدەسۋ سوڭىندا تاراپتار ەۋرازيالىق ينتەگراتسيا اسپەكتىلەرىن جانە ەكونوميكا سالاسىنداعى ءوزارا ءىس-قيمىل پەرسپەكتيۆالارىن تالقىلادى.