Qazaqstan men Resey Prezidentteri kezdesu barısında ekijaqtı ıntımaqtastıq mäselelerin jäne kün tärtibindegi bastı halıqaralıq taqırıptardı talqıladı.

Memleket basşısı Qazaqstannıñ Reseymen qarım-qatınasınıñ erekşeligine toqtalıp, eki el arasındağı senim men tüsinistik deñgeyi joğarı ekenin atap ötti.

– Biıl aramızda diplomatiyalıq qarım-qatınastıñ ornağanına 25 jıl toladı. Tığız ıntımaqtastıq arqasında biz Euraziyalıq ekonomikalıq odaqtı qwrdıq. Bwl onıñ barlıq qatısuşıları üşin mañızdı äri perspektivalı qwrılım dep sanaymın. Büginde Reseydiñ 7 mıñnan astam käsipornı Qazaqstanda ökildikterin aşıp, jañadan qayta öñdeu önerkäsibin qwruğa ıqpal etude. Sizdiñ bıltır küzde Qazaqstanğa jasağan saparıñız ben Euraziyalıq ekonomikalıq odaq ayasında Sankt-Peterburgtegi kezdesuimiz qwnı 3 milliard AQŞ dolların qwraytın 41 kelisimşartqa qol qoyuğa mümkindik berdi, – dedi Qazaqstan Prezidenti.

Nwrswltan Nazarbaev kün tärtibindegi halıqaralıq mäselelerge qatıstı Qazaqstan men Reseydiñ wstanımı birdey ekenin jäne BWW Qauipsizdik keñesi ayasında ortaq mindetterdi iske asıru üşin eki el de bar küş-jigerin jwmsaytının ayttı.

– Resey halıqaralıq özekti mäselelerdi şeşu, sonıñ işinde Siriya qaqtığısın retteu jöninde şaralar qabıldauda. Astanada birneşe kelissöz ötkizu turalı wsınıs bildirgen de Resey bolatın. Üderis bastalıp ketti. Jalpı osı jäne basqa da mäselelerdi şeşu üşin jıl boyı birqatar kezdesu ötkizu qajet, sonıñ biri 8 mausımda Astanada ötetin Şanhay ıntımaqtastıq wyımı ayasındağı basqosu bolmaq. Qazirgi barlıq mäseleler dostıq negizinde şeşilude. Birlesken käsiporındar qwrıp, alğa qaray ilgerileytin bolamız, – dep tüyindedi Memleket basşısı.

V.Putin Nwrswltan Nazarbaevqa Siriyadağı qaqtığıstı retteu jönindegi kelissözderdi Astanada wyımdastırğanı üşin alğıs bildirdi.

– Bwl üderiste Qazaqstan tarapınıñ jay wyımdastıruşı retinde ğana qatısıp qoymay, jalpı jağımdı röl atqarğanın bilemin. Siz kezdesu wyımdastıruğa tikeley atsalısıp, qatısuşılarmen jäne delegattarmen jwmıs jürgizdiñiz. Sizdiñ arqañızda eşqaşan bolmağan nätijege qol jetkizdik. Äsirese, atıstıñ toqtatıluına baqılau jasau tetigi tabıldı, bwl – eñ bastı mäsele. Endi bwl Jenevada jalğasatın kelissözderge negiz boladı, – dedi Resey Prezidenti.

V.Putin Qazaqstannıñ Reseydiñ bastı ekonomikalıq seriktesiniñ biri retindegi mañızdılığın atap ötip, integraciyalıq üderister barısında jasalğan jağday arqılı naqtı kölemdi wlğaytuğa qol jetkizip, ıntımaqtastıqtı wdayı arttırıp otıru qajettigin ayttı.

Resey Prezidenti öz eliniñ jahandıq mäselelerdi şeşude Qazaqstannıñ BWW Qauipsizdik keñesiniñ twraqtı emes müşesi retindegi qoldauınan ümitti ekenin jetkizdi.

Kezdesu soñında taraptar Euraziyalıq integraciya aspektilerin jäne ekonomika salasındağı özara is-qimıl perspektivaların talqıladı.