قازاق ءتىلىن 6 ايدا مەڭگەرۋگە ۋادە بەرگەن الماتىلىق ۆياچەسلاۆ جەلى قولدانۋشىلارىن ءتانتى ەتتى
kerey.kz
الماتىنىڭ 32 جاستاعى تۇرعىنى ۆياچەسلاۆ پوپوۆ Facebook جەلىسىندەگى پاراقشاسىندا ءبىر كەزدەرى “ۋكراين جانە ەۆرەي بابالارىن” ءوز جەرىندە قابىلداعان حالىققا قۇرمەت رەتىندە جارتى جىلدىڭ ىشىندە قازاق ءتىلىن ۇيرەنۋگە ۋادە بەردى. بۇل تۋرالى Tengrinews.kz ءتىلشىسى حابارلايدى.
“قازاق تىلىنە، ياعني ءتىلدى بىلمەيتىنىمە قارسى شىعامىن! دەكلاراتسيا! سوڭعى ءارى قايتارىمسىز تۇردە قازاق ءتىلىن بىلمەۋىمە قارسى شىعامىن! كسرو كەزىندە دۇنيەگە كەلدىم دەپ اقتالمايمىن دا، ينتەرناتتا، كەيىن مەكتەپتە ناشار ءبىلىم بەردى دەمەيمىن دە… قازاق ءتىلىن بىلمەۋىم – بۇل مەنىڭ جاۋاپكەرشىلىگىم! ناقتىسى جاۋاپسىزدىعىم! ءوزىم ۇيرەنبەدىم، قالامادىم، قاجەت دەمەدىم، قيىن دەپ قورىقتىم!
قازىر وزىمە جانە اينالامداعىلارعا، بارلىق قازاققا، ورىسقا جانە قازاقستان جەرىندە تۇرىپ جاتقان بارلىق حالىققا شىن قالاۋىڭ بولسا ءارى ءداستۇردى، مادەنيەتتى حالىقتار دوستاستىعىن قۇرمەتتەسە مەڭگەرۋگە بولاتىنىن دالەلدەگىم كەلەدى. قازاقستان مەنىڭ ۋكراين جانە ەۆرەي بابالارىمدى ءوز جەرىندە، 1927 جىلى تۇركسىب قۇرىلىسى كەزىندە قابىلداپ، كەيىن 1941-45 جىلدارداعى سوعىستا اس بەرگەن، يىقتاسىپ فاشيزمگە قارسى شايقاسقان. بۇل ماعان جانە مەنىڭ وتباسىما، بالالارىما وسى جەردە تىنىش ءارى بولاشاعى بار ءومىردى سۇرۋگە مۇمكىندىك بەردى!
وسىعان جانە وزگە دە جاعدايلارعا قۇرمەتىم رەتىندە قازاق ءتىلىن 6 اي ىشىندە، قازاق تىلىندە ەركىن سويلەپ، قازاق تىلىندە ادەبي شىعارماشالاردى وقيتىن دەڭگەيگە، تەرەڭ ماعىناسىن تۇسىنۋگە ۋادە بەرەمىن. ءبىز – اعايىنبىز! ءبىزدىڭ قانىمىز ءبىر! ءبىر ىسكە جۇمىلامىز! وسى بىلىمسىزدىكپەن كۇرەستە كومەكتەسە الار وقىتۋشىلار بار ما؟”، – دەپ جازدى ۆياچەسلاۆ. الماتىلىقتىڭ بۇل جازباسىنا ءبىر تاۋلىك ىشىندە 1,8 مىڭ لايك قويىلدى جانە 200-دەن اسا پىكىر جازىلدى. قولدانۋشىلاردىڭ باسىم بولىگى اۆتوردى قولداپ، تىلگە دەگەن قۇرمەتىنە ءتانتى بولدى. ەندىگى قولدانۋشىلار وعان قازاق ءتىلىن مەڭگەرۋدىڭ قىر-سىرىن ايتىپ، كەڭەس بەرۋگە كوشتى.
tengrinews.kz
پىكىر قالدىرۋ