عاسىرلار بويىنا شەشىمى تابىلماي كەلە جاتقان الەمدە 3 ەسەپ بار. سونىڭ بىرەۋىن 20 جاستاعى اتىراۋلىق اقىلبەك كوپجاساروۆ شىعاردى.

ول شىعارعان ەسەپ بۇرىشتىڭ ءۇش سەكتسياسى تۋرالى. ەسەپتىڭ شىعارىلعانىن فيلدسوۆسك سىيلىعى كوميتەتى مەن ەۋروپاداعى ماتەماتيكتەردىڭ قاۋىمداستىعى راستادى دەپ جازادى 365info.kz  «اق جايىق» باسىلىمىنا سىلتەمە جاساپ.

اقىلبەك شەشىمى جوق ەسەپ جايلى فاكۋلتاتيۆتىك ساباقتىڭ بىرىندە ءوز ۇستازى اۋزىنان 15 جاسىندا ەستىپتى. سودان بەرى ول قولى قالت ەتسە وسى ەسەپتى شىعارۋعا باسىن اۋىرتاتىن بولعان. اقىرى ول تاياۋدا ەسەپتى شىعارادى. ءسويتىپ ونى ەۋروپاداعى ماتەماتيكتەر قاۋىمداستىعىنا جولدايدى. 2 ايدان سوڭ ولاردان جاۋاپ كەلەدى.

سويتسە ەۋروپالىق ماتەماتيكا كونگرەسى قازاق بالاسىن 2018 جىلعى سىيلىققا ۇسىناتىنىن جازىپتى. ال ونىڭ بۇل ەسەبى سول قاۋىمداستىقتىڭ سايتىنا ورنالاستىرىلادى. سول كەزدەن باستاپ دۇنيەجۇزى ماتەماتيكتەرىنەن اقىلبەككە حات قارشا بوراعان.

ال اقىلبەك سول حاتتىڭ ءبىرى ەسەپتىڭ دۇرىس ەمەستىگىن دالەلدەۋگە تىرىسسا قايتەمىن دەپ قاتتى قوبالجىپتى. بىراق ءبىر دە ءبىر ماتەماتيك اقىلبەك شىعارعان ەسەپكە ازىرگە كۇمان كەلتىرمەگەن.

نوبەل سىيلىعى سەكىلدى ماتەماتيكتەرگە تاعايىندالاتىن ابەل سىيلىعىنان اقىلبەك ءۇمىتتى ەكەنىن جاسىرمايدى. ونىڭ كولەمى 1 ملن دوللار كورىنەدى. ال ابەل سىيلىعىنىڭ يەگەرىن حالىقارالىق ماتەماتيكالىق وداق پەن ەۋروپاداعى ماتەماتيكتەردىڭ قوعامى تاعايىندايتىن بەس عالىمنان تۇراتىن كوميتەت انىقتايدى ەكەن.

قالاي دەگەنمەن دۇنيەجۇزى عالىمدارىن اقىلبەكتىڭ جاستىعى مەن ەشقانداي عىلىمي اتاعى جوقتىعى تاڭ قالدىرىپتى. ال اقىلبەكتىڭ ءوزى عىلىمي اتاققا ەشقاشان قىزىقپاعانىن، وعان جۇمساعان ۋاقىتتى ول وسىنداي ەسەپتى شىعارۋعا جۇمساۋدى ءجون كورەدى.

ستۋدەنت اقىلبەك تەحنيكالىق زاتتار ساتاتىن دۇكەندە جۇمىس ىستەپ، اتا-اناسىنا اۋىرتپالىق تۇسىرمەگەن.

«ماتەماتيكالىق سايتتارعا كىرىپ، وسى ەسەپتى شىعارۋعا تىرىسقان ادامداردىڭ تاجىريبەسىن ابدەن زەردەلەدىم. بارلىق امالدى قولدانىپ كوردىم، بولمادى. ەڭ سوڭىندا كيپەرت گيپەربولاسىن گيلبەرت دالەلىمەن جانە ءۇشىنشى شەڭبەر ەرەجەسىمەن قولدانىپ كورۋگە تىرىستىم. سودان شىعا كەلدى»، — دەيدى اقىلبەك.

365info.kz