مەملەكەت باسشىسىنا جولاۋشىلار جۇردەك پويىزدارى قوزعالىسىن دامىتۋ باعدارلاماسىنىڭ ىسكە اسىرىلۋى جونىندە، سونداي-اق «ۆوكزال كەشەنى قۇرىلىسىن قامتيتىن استانا تەمىرجول تورابىن دامىتۋ» جوباسىنىڭ ورىندالۋ بارىسى تۋرالى باياندالدى.

قازاقستان پرەزيدەنتى ينفراقۇرىلىمدىق نىساندى ارالاپ كورۋ بارىسىندا اقپارات قۇرالدارى وكىلدەرىنىڭ الدىندا ءسوز سويلەدى.

– ساناۋلى كۇندەردەن سوڭ «ەكسپو-2017» كورمەسى اشىلادى. وسىعان وراي بۇگىن ەلوردانىڭ جاڭا نىساندارىن ارالاپ كوردىم. بۇل جاڭا قۇرىلىستار – استانانىڭ ماقتانىشى. بۇكىل ەۋروپا مەن ازيانى تۇگەلگە جۋىق قامتيتىن جاڭا اۋە باعدارلارى پايدا بولۋدا. جاڭا نىساندار باس قالامىزدىڭ جاڭا كەلبەتىن ايشىقتايدى. «نۇرلى جول» ۆوكزالى – بىرەگەي نىسان، پوستكەڭەستىك كەڭىستىكتە مۇنداي ۆوكزال جوق، – دەدى نۇرسۇلتان نازارباەۆ.

سونىمەن قاتار، مەملەكەت باسشىسى استانادان ەلىمىزدىڭ بارلىق وڭىرىنە جوعارى جىلدامدىقپەن جەتكىزەتىن «تالگو» پوەزدارىنىڭ جۇرە باستاعانى جاقسى جاڭالىق ەكەنىنە توقتالىپ، ينفراقۇرىلىم جانە كولىك سالاسىنداعى دامۋىمىزدىڭ قارقىن الا تۇسكەنىن اتاپ ءوتتى.

– وسىنىڭ بارلىعى مەملەكەتىمىزدىڭ بولاشاعى ءۇشىن جاسالۋدا. بۇل جوبالار «نۇرلى جول» باعدارلاماسى اياسىندا جۇزەگە اسىرىلدى. جاڭا تەرمينالدى ىسكە قوسۋ ارقاسىندا اۋەجايدىڭ جولاۋشىلاردى وتكىزۋ مۇمكىندىگى جىلىنا ءۇش ميلليوننان سەگىز ميلليون ادام مولشەرىنە دەيىن ارتادى. «ەكسپو-2017» كورمەسىنىڭ بارلىق قوناقتارى استاناعا وسى جاڭا نىساندار ارقىلى كەلەدى، – دەدى قازاقستان پرەزيدەنتى.

***

ۆوكزال كەشەنى – جالپى الاڭى 126 مىڭ شارشى مەتر بولاتىن التى دەڭگەيلى عيمارات. وعان پويىزداردى قابىلداپ-جونەلتەتىن التى جول جالعاسادى. جولاۋشىلاردى پويىزعا وتىرعىزۋ مەن ءتۇسىرۋ ءۇشىنشى قابات ارقىلى جۇرگىزىلەدى. ۆوكزال جولاۋشىلار اعىنىن، ادامدار كەزەگىن، قاۋىپسىزدىكتى، بيلەتتى ەلەكتروندىق تاسىلمەن ساتۋ ءىسىن باسقارۋ مەن باقىلاۋدىڭ زاماناۋي وزىق ينتەللەكتۋالدىق جۇيەلەرىمەن جابدىقتالعان.