ومۋربەك بابانوۆ اتامباەۆتىڭ بەرگەن ۋادەسى تۋرالى ايتتى
kerey.kz
قىرعىزستان پرەزيدەنت سايلاۋىنا ءتۇسىپ جاتقان كانديدات ومۋربەك بابانوۆتىڭ (وڭ جاقتان ەكىنشى) داۋىس بەرىپ جاتقا ءساتى. بىشكەك، 15 قازان 2017 جىل.
قىرعىزستان پرەزيدەنت سايلاۋىنا ءتۇسىپ جاتقان كانديدات ومۋربەك بابانوۆ سايلاۋ كەزىندە بولعان زاڭ بۇزۋ وقيعالارى جونىندە مالىمدەمە جاسادى. ول سايلاۋ ءادىل ءارى اشىق ءوتتى دەپ سانامايتىنىن ايتتى.
بابانوۆ «كانديداتتىعىمدى ۇسىنباي تۇرىپ پرەزيدەنتپەن اقىلداسقان ەدىم. ول باتاسىن بەرىپ، ء“يا، پرەزيدەنت سايلاۋىنا ءتۇس. ءبىز ءوز كانديداتىمىزدى ۇسىنامىز، سەن دە قاتىس. جەڭگەن ادام پرەزيدەنت بولسىن” دەگەن. كۋالەر بار. ول سايلاۋ ءادىل وتەدى دەگەن ۋادە بەرگەن. بىراق تەڭ جاعداي جاسالمادى. كەيىنگى اپتادا المازبەك شارشەنوۆيچ اتامباەۆقا اقپاراتتى دۇرىس بەرمەگەن. قىرعىزستاننىڭ ۇلتتىق قاۋىپسىزدىك كوميتەتى مەن ميليتسيا ونى جالعان اقپاراتپەن اداستىرىپ وتىر. مەن ونىڭ بۇگىنگى سوزدەرىنە قاتتى قاپا بولدىم» دەدى.
قىرعىزستاندا بۇگىن پرەزيدەنت سايلاۋى ءوتىپ جاتىر.
پرەزيدەنت المازبەك اتامباەۆ سايلاۋ ۋچاسكەسىندە داۋىس بەرىپ شىققاننان كەيىن جۋرناليستەر ساۋالدارىنا جاۋاپ بەردى. ول «تۋرا ءبىر جارىم اي بۇرىن بابانوۆتىڭ ماعان كۇيە جاعا باستاعانىن بايقادىم. مەنى “اعا” دەپ جۇرەتىن بابانوۆ. بابانوۆتاي مەنى ماقتاعان ادامدى كورمەدىم. ءسىزدىڭ جولىڭىزدى مەن عانا جالعاستىرام دەپ جۇرەتىن بابانوۆ اياقاستىنان “ولار باسقا جولمەن كەتىپ بارادى” دەپ قالىپتى. ول ول ما، اشىق ايتايىن، ماعان بابانوۆتىڭ اتىنان ءبىر وليگارح كەلىپ 20 ميلليون دوللار ۇسىندى. مەن وعان، قىمباتتىم، ساتىلمايتىن زاتتار بار دەدىم» دەدى.
سوورونباي جەەنبەكوۆ: ءبىز ءادىل سايلاۋ ءۇشىن كۇرەستىك
قىرعىزستانداعى پرەزيدەنت سايلاۋىنا ءتۇسىپ جاتقان كانديدات سوورونباي جەەنبەكوۆ.
قىرعىزستانداعى پرەزيدەنت سايلاۋىنا ءتۇسىپ جاتقان كانديدات سوورونباي جەەنبەكوۆ بىشكەكتەگى №1327 سايلاۋ ۋچاسكەسىندە داۋىس بەردى.
داۋىس بەرگەننەن كەيىن جۋرناليستەر سۇراعىنا جاۋاپ بەرگەن ول ءوزىنىڭ جەڭەتىنىنە سەنىمدى ەكەنىن ايتتى.
- قۇداي قالاسا، حالىق قولداسا، ءبىرىنشى تۋردا ما، ەكىنشى تۋردا ما – ءبىز جەڭەمىز! ناتيجەنى كۇتەيىك. ءبىز ءادىل سايلاۋ ءۇشىن، ناتيجەنى الدىن الا ەشكىم بىلمەۋى ءۇشىن كۇرەستىك, – دەدى جەەنبەكوۆ.
سوورونباي جەەنبەكوۆ قازاق-قىرعىز شەكاراسىنداعى احۋال تۋرالى ساۋالعا دا جاۋاپ بەردى. ول «الىس تۋىستان، جاقىن كورشى ارتىق» ەكەنىن ايتتى.
- قازاقستان – باۋىرلاس ەل، ءبىر-بىرىمىزگە قۇرمەتپەن قاراۋىمىز كەرەك. مەملەكەتتەر مەن ولاردىڭ باسشىلارى ءبىرىن-ءبىرى سىيلاپ تۇرعان جاعدايدا بارلىق ماسەلەنى شەشۋگە بولادى, – دەدى ول.
ءسوزىنىڭ سوڭىندا سوورونباي جەەنبەكوۆ قىرعىزستان پرەزيدەنتى المازبەك اتامباەۆتىڭ باعىتىن جالعاستىراتىنىن ايتتى.
قىرعىزستاندا پرەزيدەنت سايلاۋى ءوتىپ جاتىر. تاڭعى سەگىزدە باستالعان سايلاۋ كەشكى سەگىزدە اياقتالدادى.
ازات ەۋروپا / ازاتتىق راديوسى
پىكىر قالدىرۋ