قولونەر كورمەسى وتەدى.
kerey.kz
قولونەرى دامىعان قازاقتىڭ تۇرمىستىق زاتتارىنىڭ تاريحى وتە تەرەڭدە. ەل اراسىنداعى شەبەرلەردىڭ شىن ىقىلاسىنىڭ ارقاسىندا بابادان قالعان اسىل مۇرامىز كوپكە قايتا تانىلا باستادى. رۋحناي جاڭعىرۋدا جادىعا ساقتاپ، ۇلتتىق كودىمىزدى ايشىقتايتىن، وزگەدە جوق ەرەكشە دۇنيە، ول – قولدانۋ كەزىندە پايداسى كوپ، اعاشتان ويىلىپ، ويۋ سالىپ ساپالى جاسالعان قازاقتىڭ كونەدەن كەلە جاتقان تۇرمىستىق زاتتارى. سان ءتۇرلى زاتتاردىڭ ءتۇرىن تۇرماق، اتاۋىندا ۇمىتقالى قاشان؟ وسى ولقىلىقتىڭ ورنىن تولتىرۋ ماقساتىندا وقۋشىلار، ستۋدەنت جاستارعا، جالپى جۇرتقا ءۇش كۇندىك كورمە كورسەتىلمەك. اياق، اياققاپ، استاۋ، باقىراش نەمەسە جولاۋشى جانىندا جۇرەتىن، جانتورسىق، ماي شايقايتىن جۋاز، كۇمىسپەن، سۇيەكپەن شەكەتۋلەگەن زەرەن، كۇبى – تالدان، ارشادان قيىپ جاسالاتىن، ايران، قىمىز پىسۋگە ارنالعان ءىشى كەڭ ىدىستى، بولماسا تەرىدەن قاتىرىپ جاسالىنعان بيە ساۋاتىن شەلەك – زەرەن ىدىسىن، كەسپەك، كەرسەن، كەسەكقاپ، ودان بولەك، اعاش استاۋدىڭ الپىستان استام تۇرىمەن تانىسا الاسىز.
ماسەلەن، وجاۋ – سۇيىق قۇياتىن ساپتى ىدىس.
مەس – اس قۇياتىن، ساقتايتىن تەرى ىدىس.
سابا – جىلقى تەرىسىنەن تىگىلەتىن، قىمىز قۇياتىن كادەلى ىدىس.
ساماۋرىن – شاي قايناتاتىن ىدىس.
تاباق – ەت تارتاتىن، كادەلى، جيەكتى اعاش ىدىس.
تابا – وتقا سالىپ نان كومەتىن ەكى بەتتى ىدىس.
تورسىق – سۋ، سۋسىن قۇياتىن شاعىن تەرى ىدىس.
توستاعان – اعاش اياقتىڭ شاعىن ءتۇرى.
تەگەش – مەتالدان جاسالعان مەسكەنىڭ ءبىر ءتۇرى.
تەگەنە – اعاشتان جاسالعان شۇڭعىل تىك جيەك ىدىس.
توپاتاي – سۋ، ءسۇت قۇياتىن كىشكەنە ىدىس.
تۇيەمويناق – تۇيەنىڭ مويىن تەرىسىنەن جاسالعان، سۋ قۇياتىن توزبايتىن ۇلكەن ىدىس.
پىسپەك – ساباداعى، كۇبىدەگى استى شايقايتىن دوڭگەلەك باستى ساپتى قۇرال. شوگەن – شويىننان جاسالعان شۇڭعىل، قازان ءتارىزدى ىدىس.
شەلەك – سۋ تاسيتىن، مال ساۋاتىن قاڭىلتىر نە اعاش ىدىس.
بيە – شەلەك تەك بيە ساۋاتىن شەلەك.
شاۋگىم – قۇماننىڭ ءبىر ءتۇرى.
شارا – اعاشتان ويىپ جاساعان قىمىز نەمەسە سۇيىق اس قۇياتىن شۇڭعىل تىك جيەك ىدىس.
شاناش – تۇز ساقتايتىن تەرى قاپشىق.
قاۋعا – قۇدىقتان سۋ تارتاتىن شەلەك.
تاباق – تاعام ساقتايتىن.
كەرسەن – اعاش تاباقتىڭ ۇلكەنى.
زاعىما – ءتۇبى تاياز ۇلكەن تاباق.
سارقىم – سۋسىن قۇياتىن تۇتقالى ىدىس.
وجاۋ – سۇيىق قۇيۋعا ارنالعان ءشومىش.
تەگەنە – جيەكتەلگەن تىك ىدىس.
توستاعان – شاعىن اعاش اياق.
سامار – ەتسالاتىن ۇلكەن استاۋ.
كۇبى – قىمىز، شۇبات پىسەتىن، ماي شايقايتىن ىدىس. جىلقىنىڭ، وگىزدىڭ مويىن تەرىسىنەن جاسالاتىن، قىمىز قۇيۋعا ارنالعان ءتۇرلى تورسىقتار. سۇيرەتپە – قىمىز ساقتايتىن ىدىس.
بوردەك – قىمىز اشىتاتىن تورسىق. بۇلقىنشاق، مەسكە،
شاناق – سۇيىق اس قۇياتىن ىدىستار.
كونەك – بيە ساۋعا ارنالعان شۇمەكتى ىدىس.
شاناش – تۇز ساقتايتىن تەرى قاپشىق. قىشتان جاسالىنعان ىدىستار: قۇمىرا – ۇزىن مويىندى تۇتقالى ىدىس.
كوزە – سۋ قۇيۋعا ارنالعان شاعىن ىدىس.
كەرەڭكە – ءسۇت قۇيۋ ءۇشىن جاسالعان قۇمىرا. حالقىمىز كەلگەن قوناققا قانداي ىدىسپەن اس تارتۋىنا دا ەرەكشە ءمان بەرگەن. كورمە كەزىندە وزگەدە دۇنيەلەرمەن جاقىن تانىسۋعا، اتادان قالعان اعاش اياققا اس قۇيىپ، اۋقاتتانۋعا دا بولادى.
پىكىر قالدىرۋ