وڭتۇستىك كورەياداعى قىسقى وليمپيادا ويىندارىنا قىتاي قۇراماسى قاتارىندا قاتىسىپ جاتقان 22 جاستاعى ەتنيكالىق قازاق ارشىنعازى شاكەن شىڭجاڭ-ۇيعىر اۆتونوميالىق ايماعىنىڭ ورتالىعى ءۇرىمجى قالاسىندا دۇنيەگە كەلگەن. 2010 جىلدان بەرى كونكيمەن جۇگىرۋدەن قىتاي قۇراماسىنىڭ مۇشەسى العاش رەت وليمپياداعا قاتىسىپ وتىر.

اقپاننىڭ 13-ءى كۇنى ارشىنعازى كونكيمەن جۇگىرۋدەن 1500 مەتر قاشىقتىقتى 1:50.16 مينۋتتا سىرعاناپ، جارىستى 35-ورىنمەن اياقتادى. ول وليمپيادا چەمپيونى اتانعان گوللانديالىق سپورتشى كەلد نەيستەن التى سەكۋندقا قالىپ قويدى.

- وليمپياداداي “جۋان جارىسقا” ء(ىرى جارىس – رەد.) كەلۋدىڭ ءوزى ۇلكەن باقىت. جاسپىن، تاجىريبە جيناۋعا بەرىلگەن مۇمكىندىك. جاتتىقتىرۋشىلارىم مەنەن كوپ ءۇمىت كۇتەدى. سوندىقتان ماعان مۇمكىندىك بەردى. وليمپيادا – جارىستاردىڭ تورەسى. [ناتيجە] ەندى مەن ءۇشىن بولادى. وسىنداي جارىسقا كەلگەنىم اتا-اناما، دوستارىما ماقتانىش. كەز كەلگەن ادام [وليمپياداعا] قاتىسا المايدى. كوپ جولدان، كوپ قيىندىقتان ءوتىپ كەلدىم. جاتتىعۋلارىمنىڭ جەمىسى، – دەيدى ول.

ارشىنعازى شاكەن 2017 جىلعى قىتاي چەمپيوناتىندا 1500 مەترگە جۇگىرۋدەن 46-ورىندا كەلسە، 2018 جىلعى قىتاي بىرىنشىلىگىندە وسى قاشىقتىققا وتكەن باسەكەدە 5-ورىن يەلەنگەن. سپورتشى قازىر 1500 مەترگە جۇگىرۋ بويىنشا قىتاي ىشكى رەيتينگىندە ءبىرىنشى ورىندا تۇرعانىن ايتادى.

“تۋىپ-وسكەن ەلىمە مەدال سىيلاعىم كەلەدى”

ارشىنعازى پحەنچحان وليمپياداسىندا اقپاننىڭ 24-ءى كۇنى ماسس-ستارت جارىسىنا قاتىسادى. سپورتشى الداعى ءتورت جىل بويى 2022 جىلى پەكيندە وتەتىن قىسقى وليمپياداعا دايىندالاتىنىن ايتادى.

- قازىر نەبارى 22 جاستامىن. كورۋ، ۇيرەنۋ ەكەن. مۇزدا ساسقالاقتاۋ بولادى ەكەن. الەم ۇزدىكتەرىمەن دەڭگەيىم ءالى ساي كەلمەيتىنىن ءتۇسىندىم. كوپ ماشىقتانۋ كەرەك. 2022 جىلى وتانىمدا وتەتىن وليمپيادا مەنىڭ مەجەم بولادى. بيىلعى وليمپيادا – ارماننىڭ باستالۋى. ارمانعا جەتۋ ءۇشىن، بيىككە شىعۋ ءۇشىن ءالى كوپ ماشىقتانامىن، – دەدى ول ازاتتىق تىلشىسىنە.

ارشىنعازى شاكەننىڭ ايتۋىنشا، “قىتاي قۇراماسىندا ۇلتقا ءبولۋ، قىتاي ۇلتىنان شىققان سپورتشىلارعا باسىمدىلىق بەرۋ دەگەن جوق. كىمنىڭ ناتيجەسى جاقسى بولسا، سوعان مۇمكىندىك بەرىلەدى”.

- قىتاي قۇراماسىندا قازاق كونكيشىلەر كوپ. باس قۇرامادا مەنەن باسقا ءداستۇر تۇرسىنحان جانە الماس قاقانباي دەگەن قازاقتار بار. “بۇل – قىتاي، بۇل – قازاق” دەپ بولمەيدى. ەشكىم ەشكىمدى الالامايدى. قىتاي ۇلتىنا باسىمدىلىق بەرىلەدى دەگەن جالعان ءسوز. جاتتىقتىرۋشىلار بارىمىزگە تەڭ قارايدى. ۇرىمجىدە جاتتىعۋعا بارلىق مۇمكىندىك بار. تۋىپ-وسكەن جەرىم – قىتاي. پاتريوتپىن. 2022 جىلعى وليمپيادادا ەلىمە مەدال سىيلاعىم كەلەدى. ەشقايدا كەتپەيمىن، باسقا ەلدىڭ ازاماتتىعىن الۋ ويىمدا جوق، – دەيدى قىتايدا تۇراتىن ەتنيكالىق قازاق.

كونكيشى ءۇرىمجى قالاسىندا تۇرىپ جاتقانىن، سوندا جاتتىعاتىنىن ايتادى. زەينەت جاسىنداعى اتا-اناسى شىڭجاڭداعى اۋىلداردىڭ بىرىندە تۇرادى ەكەن. وتباسىنداعى وزىنەن كەيىنگى ءىنىسى سپورتپەن اينالىسپايدى.

- كونكيدى 13-14 جاسىمدا باستادىم. اتا-انام – قاراپايىم بۇقارا. سولاردىڭ كوز، جۇرەك قۋانىشىمىن. بالا كەزىمنەن مۇزدى جاقسى كوردىم. مەكتەپ اۋلاسىندا بالالارمەن مۇز تەبەتىنبىز. الدىمەن ۇرىمجىدەگى ارنايى سپورت مەكتەبىندە وقىپ، سوندا جاتتىقتىم. سپورتتىڭ وسى ءتۇرىن تاڭداۋىما مۇعالىمىم سەبەپكەر بولدى. كەيىن شىڭجاڭداعى ورتالىق سپورت مەكتەبىنە ءتۇستىم. سول جەردە كوپ جاتتىعۋدىڭ ارقاسىندا جاقسى ناتيجەلەر كورسەتە باستادىم، – دەيدى ول.

ارشىنعازى شاكەن قازاقستاندا تۋىسقاندارى، دوستارى بار ەكەنىن، بىراق تاريحي وتانىندا ءالى بولىپ كورمەگەنىن ايتادى. سپورتشى كەلەر جىلى قازاقستاندا كونكيمەن جۇگىرۋدەن وتەتىن جارىستاردىڭ بىرىنە بارۋدى جوسپارلايدى. ال پحەنچحان وليمپياداسىنان كەيىن ول ناۋرىز ايىندا اقش-تا وتەتىن حالىقارالىق جارىسقا، ودان كەيىن قىتاي ىشىندەگى تۋرنيرگە قاتىسپاق.

ازات ەۋروپا / ازاتتىق راديوسى